Taılandta balalar qutqarylǵan úńgirdi qalpyna keltirýge 1,3 mln dollar jumsaldy
ASTANA. QazAqparat - Taıland úkimeti balalar fýtbol komandasy men bapkeri adasyp ketken Tham Lýang úńgiriniń ekojúıesin qalpyna keltirýge 42 mln bat mólsherinde qarjy bóldi. Bılik osy arqyly úńgirdiń týrıstik áleýetin arttyrmaq, dep habarlaıdy QazAqparat TASS-qa silteme jasap.
Eki apta boıy úńgirde adasyp júrgen balalardy qutqarý protsesine búkil álem kóz tigip otyrdy. Sondyqtan úńgirdi óz kózimen kórgisi keletin adamdar álemde kóp bolýy tıis.
Sarapshylar aýmaqty basqarýdyń naqty jospary bolmasa, úńgirdiń ishine aıtarlyqtaı zaqym keletinin aıtyp dabyl qaǵady. Qalpyna keltirý protsesi aıasynda 2,4 myń metr qubyr alynyp, ol arqyly sý tartyp shyǵaryldy.
Bılik úńgirdiń aınalasyndaǵy landshaftty sonda salynatyn bolashaq mýzeı jáne qutqarý operatsııasynyń 13-shi kúni qaıtys bolǵan 38 jastaǵy taılandyq ofıtser Saman Kýnannyń eskertkishine beıimdeýdi josparlap otyr. Jalpy, ulttyq parktegi úńgir ornalasqan 800 gektar jer abattandyrylady.
Tham Lýangta sońǵy ret 2015 jyly zertteý júrgizilgen. Sol kezde mamandar tek 700 metrdeı ǵana ishkerileı alǵan bolatyn. Sonyń ózinde mamandar úńgirdiń jasy 100 mıllıon jyldan asatynyn boljaǵan. Qazir sarapshylar úńgirdiń qaýipsizdik jaǵdaıyn egjeı-tegjeıli tekserý úshin sý deńgeıiniń tómendeýin kútip otyr. Bılik ókilderi úńgirde bolýy múmkin oqys oqıǵalardyń aldyn alý úshin týrısterge arnalǵan kórsetkishter, eskertpeler ornatý qajettigin aıtady.
