Taılandta áskerı tóńkeris boldy
ASTANA. QazAqparat - Taılandtyń qurlyqtaǵy áskeriniń qolbasshysy general Praıýt Chan-Ocha eldegi áskerı tóńkeris jaıly jarııa etti, dep habarlady ITAR-TASS.
"Eldegi beıbitshilik pen tynyshtyqty qamtamasyz etý maqsatynda Taılandtyń qarýly kúshteri úkimet fýnktsııalaryn óz moınyna alady", - dedi ol teledıdar arqyly halyqqa baǵyshtaǵan sózinde. Qolbasshynyń ultqa arnalǵan teleúndeýinen birneshe mınýt buryn onyń buıryǵymen áskerı qyzmetkerler kelissóz zalynan oppozıtsııalyq demonstranttardyń lıderi Sýthep Thyaksýbandy alyp shyqty. Esterińizge sala keteıik, Taılandtaǵy saıası daǵdarys 2013 jyldyń qarasha aıynan bastalǵan. Sol kezde Bangkokta eldiń premery Iınglak Chınavat saıasatyna qarsy birneshe demonstratsııalar ótken. Taılandtyqtar úkimet basshysy óziniń aǵasynyń aıtqanymen júr degen uıǵarym jasap, soǵan narazylyq bildirgen. Al onyń aǵasy 2006 jylǵy tóńkeristen keıin shetelde turyp jatqan eks-premer Taksın Chınavat. Aıta keteıik, 19 mamyrda Taılandtyń qarýly kúshteri áskerı jaǵdaı jarııalap, eldegi turaqtylyqty qamtamasyz etý mindetin óz moınyna aldy. Áskerılerdiń ózi muny «kezekti tóńkeris emes» dep túsindirdi. Olardyń sózine qaraǵanda, bul beıbitshilik pen quqyqtyq tártipti qamtamasyz etý maqsatynda júzege asyrylýda.
