Taılandta alǵash ret MERS vırýsy anyqtaldy
ASTANA. QazAqparat - Taılandta alǵash ret MERS (taıaýshyǵystyq respıratorlyq sındrom) vırýsyn juqtyrǵan adam anyqtaldy. Ony 75 jastaǵy Oman eliniń azamaty juqtyrǵan, dep habarlaıdy RIA Novostı.
Sarapshylar MERS vırýsy qazirgi ýaqytta Taıaý Shyǵys pen Saýd Arabııasynda taralǵan dep shamalap otyr. Olardyń pikirinshe, bul vırýsty bastapqy kezeńinde anyqtaý óte qıynǵa soǵady. Sebebi, onyń jalpy belgileri tumaýdyń belgilerine tym uqsas. Tek aýrý belgili bir deńgeıine deıin jetkende ǵana vırýstyń shynaıy belgileri baıqala bastaıdy. Ońtústik Koreıada atalǵan vırýstan 24 adam kóz jumdy. Barlyǵy 166 adam atalǵan vırýsty juqtyrǵan.
