Kıberqylmysy úshin izdeýde júrgen haker Taılandta qolǵa tústi

ASTANA. KAZINFORM — Taılandtyń kıber polıtsııasy Eýropa men AQSh-taǵy memlekettik júıelerdi buzdy dep aıyptalǵan 35 jastaǵy reseılik azamatty ustady. Amerıka bıligi ony ekstradıtsııalaýdy talap etip otyr, dep habarlaıdy DW.

AQSh pen Eýropanyń úkimet júıelerine kıbershabýyl jasady dep kúdikke ilingen Reseı azamaty AQSh-tyń ótinishi boıynsha Taılandta ustaldy. Taıland bıligi kúdiktiniń 35 jastaǵy álemdik deńgeıdegi haker ekenin habarlady. Qazir ony AQSh-qa ekstradıtsııalaý jumystary júrgizilip jatyr. Reseıdiń Phýkettegi bas konsýly Egor Ivanov Reseı tarapy tutqynǵa konsýldyq ruqsat surap jatqanyn málimdedi.

Taılandtyń kıber polıtsııasynyń habarlaýynsha, reseılik 6 qarashada Phýket aralynda FBR agentterimen birlesken operatsııa kezinde ustalǵan. Ol 30 qazanda elge kirip, Talang aýdanyndaǵy qonaqúıge ornalasqan. Tintý kezinde odan noýtbýk, uıaly telefon, krıptovalıýta ámııandary tárkilendi. Reseı azamatynyń krıptovalıýtadaǵy shottaryndaǵy 14 mıllıonnan astam bat (shamamen 432 myń dollar) buǵattaldy. Tergeýshilerdiń aıtýynsha, bul qarajat kıberalaıaqtyqpen baılanysty bolýy múmkin.

Kúdiktiniń aty-jóni resmı túrde jarııalanǵan joq. Degenmen, «Vot tak» basylymy FBR derekqorynda kıberqylmysy úshin izdeýde júrgen 35 jastaǵy bir ǵana reseılik azamattyń esimi bar ekenin atap ótti. Ol Mýrmansk oblysynyń týmasy, Reseı Bas shtabynyń Bas barlaý basqarmasynyń aǵa leıtenanty Alekseı Lýkashev.

FBR jazbalaryna sáıkes, Lýkashevtyń 2016 jylǵy AQSh prezıdenttik saılaýyna aralasý jáne Demokratııalyq partııanyń serverlerin buzý isine qatysy bar. Onyń esimi osy is boıynsha 12 aıyptalýshynyń qataryna engen. 

Aıta keteıik, hakerler Bybit krıptovalıýta bırjasynan 1,5 mlrd dollar urlap, eń úlken tsıfrlyq urlyq jasady.