Taılandta 24 saǵat ishinde ekinshi ret kran qulap, adamdar qurban boldy

ASTANA.KAZINFORM - Taılandta taǵy da qurylys krany qulap, eki adam qaza tapty. Keshegi kran apatynan keıin eldiń basqa aımaǵynda dál sondaı oqıǵa qaıtalandy.

Kran Bangkok shetinde jol salý úshin paıdalanylǵan.

Sońǵy habarlarǵa sáıkes, sársenbi kúni Taılandtyń soltústik-shyǵysynda kran qozǵalyp kele jatqan poıyzǵa qulap, 32 adam qaza tapty.

BBC-diń habarlaýynsha, Taılandtyń eń iri qurylys salýshylardyń biri Italian-Thai Development kompanııasy eki qurylys jobasyna da jaýapty bolǵan.

Kompanııa sonymen qatar ótken naýryzda jer silkinisi kezinde qulaǵan Bangkoktaǵy záýlim ǵımaratqa da jaýapty.

Taılandtaǵy qurylys alańdaryndaǵy ólimge ákeletin apattar jıilep keledi, bul ishinara standarttar men erejelerdiń saqtalmaýyna baılanysty bolyp otyr.

Sońǵy jeti jylda Bangkoktan eldiń ońtústigine qaraı sozylatyn tasjol ýchaskesindegi apattar kezinde shamamen 150 adam qaza tapty.

AFP aqparat agenttiginiń habarlaýynsha, beısenbi kúni qulaǵan tasjol sońǵy jyldary birneshe ret bolǵan apattarǵa baılanysty «Ólim joly» degen atqa ıe boldy.

Taıland premer-mınıstri qurylystaǵy «nemquraılylyq» máselesin sheshetinin málimdedi.

Buǵan deıin Taılandta Phýket aralynyń mańyndaǵy Andaman teńizinde demalys kemesi men balyq aýlaıtyn qaıyqtyń soqtyǵysýynan 20-dan astam týrıst, onyń ishinde segiz qazaqstandyq jaraqat alǵan bolatyn.