Taılandta 2 aptadan beri úńgirde qamalyp otyrǵan oqýshylardy evakýatsııalaý bastaldy
ASTANA. QazAqparat - Qutqarýshylar oqýshylardan quralǵan fýtbol komandasy men olardyń jattyqtyrýshysyn evakýatsııalaý operatsııasyn bastady. Olar eki aptadan astam ýaqyt boıy Khao Lýang úńgirinde qamalyp otyr. Bul týraly jeksenbi kúni Chıangraı provıntsııasynyń burynǵy gýbernatory, operatsııa jetekshisi Narongsak Osotthanakon baspasóz máslıhatynda málim etti, dep habarlaıdy TASS.
«Búgin balalar kez kelgen qaýip-qaterge daıyn. Biz daıyndyqtyń sharyqtaý shegindemiz», - dedi ol.
Sondaı-aq, Narongsak Osotthanakon jergilikti ýaqytpen saǵat 10-da 18 súńgýir úńgirdiń ishine oqýshylardy qutqarýǵa ketkenin aıtty. Qutqarý operatsııasyna 13 sheteldik jáne 5 taılyq súńgýir qatysyp jatyr.
Operatsııa jetekshisiniń aıtýynsha, oqýshylardyń birinshi legi úńgirden jergilikti ýaqytpen keshki saǵat 9-darda shyǵarylady.
Qutqarýshylardyń baǵalaýy boıynsha, evakýatsııanyń barlyq protsesine 3-4 kún ýaqyt ketedi. Sebebi, jer astyndaǵy qashyqtyq tym uzaq.
«Eger biz biraz ýaqyt kútip qalyp, jańbyr bastalyp ketse, sýdy aıdap shyǵarý qajet», - dep túsindirdi qutqarý operatsııasynyń jetekshisi.
The Nation basylymynyń aqparaty boıynsha, jerdiń betine shyǵarylatyn oqýshylardyń birinshi toby tórt adamnan quralmaq. Ulttyq park qyzmetkerleri 23 maýsym kúni úńgirge kiretin jerden mototsıkl, velosıped jáne sporttyq ınventar taýyp alǵan. Olar jergilikti fýtbol klýbymen baılanysyp, tabylǵan zattardyń 11-16 jas aralyǵyndaǵy oqýshylarǵa jáne 25 jastaǵy jattyqtyrýshysyna tıesili ekendigin anyqtaǵan. Úńgir 10 shaqyrymǵa sozylyp jatyr, onyń birneshe kiretin jáne shyǵatyn jerleri bar. Taıland bıligi úńgirde qalyp qoıǵandardy qutqarý operatsııasyn uıymdastyrdy.
