Taılandta 15 kúndik aza tutý jarııalandy
ASTANA.KAZINFORM - Taıland koroli Maha Vachıralongkorn úlken qyzy hanshaıym Badjrakıtııabhanyń qaıtys bolýyna baılanysty 15 kúndik resmı aza tutý jarııalady, dep habarlaıdy ASEAN NOW Thailand.
Úkimet ǵımarattaryna, memlekettik mekemeler men bilim berý mekemelerine búkil el boıynsha týlardy jartylaı túsirý tapsyryldy.
Bul sheshim hanshaıymdy eske alý úshin bir mınýt únsizdik jarııalanǵan arnaıy Mınıstrler kabınetiniń otyrysynda qabyldandy. Úkimetke jerleý rásimi men patshalyq rásimderdiń tıisti qurmetpen jáne barlyq dástúrdi saqtaı otyryp ótkizilýin qamtamasyz etý tapsyryldy.
Azamattardan aza tutý kezeńin belgilengen erejelerge sáıkes ótkizý suraldy.
Qol jetkizilgen kelisimderge sáıkes, Premer-Mınıstrdiń Turaqty hatshysynyń keńsesi patshalyq jerleý rásimderin baqylaý úshin Premer-Mınıstrdiń tóraǵalyǵymen komıtet qurady.
Esterińizge sala keteıik, uzaq ýaqyt komada jatqan hanshaıym Badjrakıtııabha 47 jasynda qaıtys boldy.
Hanshaıym Badjrakıtııabha taılyqtar arasynda memlekettik qyzmet jáne ádilet reformasy jobalarymen, ásirese túrmede otyrǵan taı áıelderin bosatpas buryn ońaltý naýqanyn uıymdastyrýymen tanymal boldy.
