Taılandta 12 aıǵa jaramdy kóp rettik týrıstik vıza engizilmek
ASTANA. QazAqparat - Taıland eliniń bılik kózderi taıaý ýaqytta 12 aıǵa jaramdy kóp rettik týrıstik vızany engizbek, dedi sheteldik dıplomattardyń aldynda sóılegen sózinde osy eldiń týrızm jáne sport mınıstri Kopkan Vatthanavarangkýn.
Mınıstr otyz eldiń elshileriniń aldynda óziniń arnaıy uıymdastyrylǵan qabyldaýynda sóz sóıledi.
«Biz alty aıǵa jáne on eki aıǵa jaramdy kóp rettik týrıstik vızalardy qoldanysqa engizý boıynsha jumystar istep jatyrmyz. Bul vızalardy aǵymdaǵy jyldyń jeltoqsan aıynda berýdi josparlap otyrmyz», - dep málim etti dıplomattarǵa Vatthanavarangkýn.
Óz sózinde ol sondaı-aq Phýket jáne Chıangmaı sııaqty týrıstik aımaqtardaǵy burynnan kele jatqan taksı qyzmetiniń qymbat bolýy problemasyn kólik mınıstrigimen birlesip sheshý baǵdarlamasy týraly aıtyp berdi.
Sonymen qatar mınıstr bıylǵy jyldyń sońyna deıin týrısterdiń shaǵymdaryn qarastyratyn mamandandyrylǵan sottardyń sany altydan on beske deıin kóbeıetinin habarlady.
Týrızm mınıstrliginiń basshysy sheteldik elshilerge týrısterdiń elde júrgen kezdegi qaýipsizdigin qamtamasyz etý boıynsha sharalar týraly jetkizdi.
Aıta keteıik, bıylǵy jyldyń qańtar aıynyń basynan mamyrǵa deıingi aralyqta Taıland 19 mıllıon sheteldik týrısterdi qabyldady, bul ótken jyldyń osyndaı kezeńimen salystyrǵanda 16 paıyzǵa kóp, dep habarlaıdy RIA Novostı.
