Taılandqa saıahattaý qıyndaı túspek: Eýropalyqtar úshin vızasyz merzim qysqarady

15 qyrkúıekten bastap Eýropalyq odaq elderiniń azamattary Taılandta vızasyz burynǵydaı 60 emes, 30 kún ǵana bola alady.

Ońtústik-Shyǵys Azııa eli 60-tan astam memleket pen aýmaqtyń týrısteri úshin vızasyz bolý merzimin eki esege qysqartyp, 30 kúnge deıin tómendetetinin málimdedi.

Bul shara týraly alǵash ret mamyr aıynda aıtylǵan bolatyn. Endi onyń 15 qyrkúıekten bastap kúshine enetini rastaldy.

Euronews Travel buǵan deıin habarlaǵandaı, mundaı sheshim sheteldikterdiń qatysýymen bolǵan birqatar atyshýly qylmystarǵa baılanysty qabyldanýy múmkin.

Jergilikti buqaralyq aqparat quraldarynyń habarlaýynsha, sońǵy aılarda sheteldik azamattar esirtki saýdasy men adam saýdasynan bastap, tıisti ruqsatsyz qonaqúı men mektep sııaqty kásipkerlik qyzmetpen aınalysýǵa deıingi túrli qylmystar jasady degen kúdikpen ustalǵan.

Soǵan qaramastan, týrızm Taıland ekonomıkasy úshin asa mańyzdy. Taıland týraly Euronews Travel materıaldarynda el ekonomıkasynyń 10 paıyzdan astamyn týrızm quraıtyny aıtylǵan. Sol sebepti Taıland Azııa qurlyǵyndaǵy týrıster eń kóp baratyn elderdiń biri bolyp qala beredi.

Qazir 90-nan astam eldiń azamattary, onyń ishinde Shengen aımaǵyna kiretin 29 memleket, Taılandta vızasyz 60 kúnge deıin bola alady.

Alaıda eki aptadan keıin osy elderdiń 60-tan astamynyń, sonyń ishinde EO memleketteriniń azamattary úshin vızasyz bolý merzimi 30 kúnge deıin qysqarady.

Taıland Syrtqy ister mınıstrliginiń Konsýldyq máseleler departamenti taǵy shamamen 20 eldiń azamattaryna qatysty qandaı sheshim qabyldanǵanyn ázirge jarııalaǵan joq.

Al Perý, Brazılııa jáne Ońtústik Koreıa azamattary úshin vızasyz bolý merzimi, kerisinshe, uzartylady. Aıdyń ortasynan bastap olar Taılandta vızasyz qazirgi 60 kúnniń ornyna 90 kúnge deıin bola alady.

Eýropalyq týrıster úshin balama múmkindikter bar

Eýropalyq týrıster úshin bul jańalyqtyń jaǵymsyz tustary bolǵanymen, birqatar jeńildik te saqtalady.

Euronews Travel buǵan deıin habarlaǵandaı, vızasyz rejımmen elge kirgen týrıster ımmıgratsııalyq qyzmetkerdiń sheshimi boıynsha Taılandta bolý merzimin bir ret uzarta alady.

Sonymen qatar Destination Thailand Visa (DTV) rásimdeýge bolady. Bul vıza elde bir ret kirgen kezde 180 kúnge deıin bolýǵa múmkindik beredi jáne ony taǵy 180 kúnge uzartýǵa bolady.

Alaıda munda mańyzdy talap bar: ótinish berýshi bank shotynda keminde 500 myń bat nemese 13 myń eýro bar ekenin rastaýy tıis. Al qashyqtan jumys isteıtin azamattar buǵan qosa Taılandtan tys jerde jumys isteıtinin dáleldeıtin qujat usynýy qajet.

2026 jyldyń basynan beri Taılandqa 21 mıllıonǵa jýyq sheteldik týrıst barǵan. Alaıda bul ótken jyldyń osy kezeńimen salystyrǵanda 3 paıyzǵa az. Bul týrıstik aǵynnyń ázirge pandemııaǵa deıingi deńgeıge qaıta oralmaǵanyn kórsetedi.

Osyǵan deıin Taılandta týrısterdiń joljúgin olardyń qatysýynsyz ashýǵa ruqsat etiletinin jazǵan bolatynbyz.