Taılandta kóp joldama alǵymyz keledi – bokstan Qazaqstan áıelder quramasynyń bapkeri

ASTANA. KAZINFORM - Bokstan Qazaqstan quramasy Bangkokta ótetin 2024 jylǵy Parıj Olımpıadasyna sońǵy joldamalar sarapqa salynatyn álemdik týrnırge attandy. 

Osyǵan oraı, bokstan Qazaqstan áıelder quramasynyń bas bapkeri Eldos Saıdalınge arnaıy qońyraý shalyp, burymdy boksshylarymyzdyń daıyndyǵy týraly surap-bilgen edik.

«Bangkokta ótetin álemdik lıtsenzııalyq týrnırge attanyp bara jatyrmyz. Oqý-jattyǵý jıyny oıdaǵydaı ótti. Boksshy qyzdarymyz Almaty oblysyndaǵy Olımpııalyq bazada tyńǵylyqty daıyndaldy. Jattyǵýlardy eki kezeńge boıynsha ótkizdik. Ózderińiz bilesizder, sońǵy lıtsenzııalyq týrnırge baratyn boksshylardy Astanada arnaıy iriktedik. Quramada kóptegen ózgeris bar. Endi, bizdiń aldymyzdaǵy jalǵyz maqsat – barynsha kóbirek joldamaǵa qol jetkizý», - dep atap ótti bas bapker.

Alaıda ol Bangkokta naqty qansha joldamaǵa qol jetkizýdi kózdep otyrǵanyn ashyp aıtqan joq.

«Ázirge, áıelder boksynan jalǵyz joldama ǵana bar. Jalpy, Parıjge tolyq quramda barý úshin bizge áli bes joldama jetpeıdi. Bapkerdiń basty maqsaty – Olımpıadaǵa shákirtterin barlyq salmaqta aparý. Alaıda, Taıland sharshy alańynda naqty qansha joldama bolaryn boljaý qıyn. Sondyqtan, men bul máselege ázirge eshteńe aıta almaımyn. Bárin sharshy alań kórsetedi», - dedi bas bapker Eldos Saıdalın. 

Aıta keteıik, áıelder quramasyndaǵy jalǵyz joldamany 57 keli salmaqta Karına Ibragımova jeńip alǵan. Ol ony byltyr Qytaıdyń Hanchjoý qalasynda ótken Azııa oıyndarynda ıelendi. 

Esterińizge sala keteıik, osyǵan deıin Taılandtaǵy álemdik lıtsenzııalyq týrnırge kimder baratynyn jazǵan bolatynbyz.