Taıland vıza aıyppuldaryn alyp tastap, sheteldikterge kúnine 55 dollarǵa deıin tólem belgiledi
ASTANA. KAZINFORM – Taıland bıligi Taıaý Shyǵystaǵy jaǵdaıdyń shıelenisýi aıasynda reısterdiń toqtatylýyna baılanysty elde qalyp qoıǵan sheteldik týrısterge ýaqytsha qoldaý sharalarynyń engizilgenin jarııalady.
Thai Examiner basylymynyń málimetinshe, elde bolý merzimin ótkizip alǵany úshin aıyppuldardan bas tartý, qonaqúıde turýǵa jeńildikter berý jáne bir túnge 2000 bat (shamamen 55 dollar), bir adamǵa eń kóbi 20 myń bat (shamamen 550 dollar) tólemder qarastyrylǵan.
Taıland ımmıgratsııalyq bıligi áýe keńistiginiń jabylýyna baılanysty elden shyǵýǵa múmkindigi joq sheteldik azamattardyń elde bolý merzimin ýaqytsha uzartýǵa quqyly ekenin málimdedi.
Vızany kez kelgen ımmıgratsııalyq keńsege ótinish berý arqyly 30 kúnge deıin uzartýǵa bolady. Qabyldanǵan sharalar jaǵdaı qalpyna kelgenshe kúshinde qalady.
Taıland Týrızm jáne sport mınıstrliginiń aqparatynsha, áýe qatynasyndaǵy úzilister Taıaý Shyǵystaǵy jaǵdaıdyń shıelenisýimen baılanysty. Saldarynan Dýbaı arqyly ushatyn baǵyttardy alǵanda júzdegen reıs toqtatyldy, birqatar áýe kompanııasy ushý kestesin qysqartty. Eldegi tórt áýejaı ýaqytsha shekteýlerge tap boldy, bul shetel azamattarynyń ushýyn keshiktirgen.
Týrızm jáne sport mınıstrliginiń hatshysy Nattarııa Taveevong qıyn jaǵdaıda qalǵan týrıster úshin jeńildikpen turýdy qamtamasyz etý sharalaryn qabyldaýdy tapsyrdy. Qonaqúılerge ýaqytsha qalyp qoıǵan sheteldikter úshin arnaıy tarıfter usyný keńes etilgen.
Eske sala ketsek, Qazaqstan Respýblıkasynyń Saýd Arabııasy Koroldigindegi Tótenshe jáne ókiletti elshisi Madııar Meńilbekov el azamattarynyń qaýipsizdigine qatysty egjeı-tegjeıli túsinik berdi. 2026 jylǵy 3 naýryzǵa qaraǵan túni FZ1533 Dýbaı — Almaty (170 oryn) jáne FZ1395 Dýbaı — Astana (170 oryn) reısteriniń ushýy josparlanyp otyr.
Irannan kórshiles elder arqyly Qazaqstan azamattaryn evakýatsııalaýdyń baǵyttary anyqtaldy.Sondaı-aq Air Astana qazaqstandyqtardy qaıtarý úshin Medına men Djeddaǵa reıs oryndaýy múmkin ekeni belgili boldy.
