Taıland týrısterge shyǵý salyǵyn engizýdi keıinge qaldyrdy
ASTANA. KAZINFORM — Taılandtyń Qarjy mınıstrligi týrıstik salany qoldaý maqsatynda elden shyǵatyn jolaýshylarǵa 1 000 bat (13,3 myń teńge) mólsherinde salyq engizýdi keıinge qaldyrý týraly sheshim qabyldady, dep habarlaıdy The Nation Thailand.
Taılandtyń Qarjy mınıstri Eknıtı Nıtıthanprapastyń málimdeýinshe, vedomstvo jaqyn arada jańa alymdy engizbeý týraly sheshim qabyldaǵan. Sebebi qosymsha shyǵyndar týrıstik salaǵa keri áser etýi múmkin.
Mınıstrdiń aıtýynsha, bılik jyl sońyndaǵy tórtinshi toqsanda týrıstik saparlardyń oń dınamıkasyn saqtap qalýdy kózdep otyr.
Salyq engizýdi keıinge qaldyrýdyń taǵy bir sebebi – Taıaý Shyǵystaǵy qaqtyǵys aıasynda energııa tasymaldaýshylar baǵasynyń qymbattaýy. Bul áýe kompanııalary men saıahatshylardyń shyǵyndaryn arttyryp otyr.
Buǵan deıin Taıland bıligi azamattyǵyna qaramastan, shetelge ushatyn jolaýshylardan 1 000 bat (13,3 myń teńge) kóleminde salyq alýdy usynǵan bolatyn. Bul alymdy áýe bıletiniń qunyna qosý josparlanǵan.
Zań jobasy boıynsha qoǵamdyq talqylaý 30 qyrkúıekte bastalyp, 29 qazanda aıaqtalýy tıis.
Sonymen qatar Qarjy mınıstrligi salyqty keıinge qaldyrý elge kiretin týrısterden 450 bat mólsherinde alym alý týraly bólek usynysqa áser etpeıtinin atap ótti.
Elden shyǵý salyǵyn engizýdiń jańa merzimi ázirge belgilenbegen.
Buǵan deıin Taıland sheteldik týrısterden alym alý múmkindigin qarastyryp jatqany habarlanǵan edi.
Aıta ketelik Qazaqstan men Taıland astanalary arasynda tikeleı áýe qatynasy ashylady.
