Taıland týrısterdiń elde vızasyz bolý merzimin eki ese qysqartady
ASTANA. KAZINFORM – Taıland qylmystyń aldyn alý maqsatynda týrısterdiń elde vızasyz bolý merzimin 60 kúnnen 30 kúnge deıin qysqartady, dep habarlaıdy The Nation.
Bul shara 2024 jyldyń shildesinen bastap 60 kúnge deıin vızasyz rejımdi engizgen 93 elden kelgen týrısterge qatysty bolady.
Taıland Syrtqy ister mınıstrligi sheteldik týrısterdiń vızasyz bolý merzimin qysqartý josparyn Mınıstrler kabınetine bekitýge usynbaqshy. Bastamany qaralatyn naqty kún áli jarııalanǵan joq.
Bul sheshim sheteldik azamattardyń zańsyz áreketteri týraly habarlamalarǵa, sondaı-aq belgisiz adamdardyń elde zańsyz bolý jaǵdaılaryna baılanysty qabyldandy.
Osyǵan baılanysty taı bıligi kelýshilerdiń saparlarynyń kórsetilgen maqsatyna sáıkes kelýine kóz jetkizý úshin vızasyz rejımdi ǵana emes, sonymen qatar basqa vıza túrleri úshin de tekserýdi kúsheıtýdi josparlap otyr.
Bıliktiń pikirinshe, bolý merzimin qysqartý ózderin týrıst bolyp kórsetip, elge basqa maqsattar úshin kelgen jeke tulǵalardyń kirý qaýpin azaıtady.
Zertteýge sáıkes, sheteldik týrısterdiń Taılandta ortasha bolý ýaqyty qysqa jáne uzaq merzimdi saparlar úshin toǵyz kúnnen sál asady.
Taılandtyń týrızm jáne sport mınıstri Sýrasak Phancharoenvorakýl atap ótkendeı, elge taǵylymdamadan ótý nemese medıtsınalyq emdeý sııaqty basqa maqsattarmen keletin sheteldikter tıisti vızalardy resimdeı alady.
- Biz 60 kún tym uzaq bolýy múmkin dep sanaımyz jáne shynaıy týrıst emes keıbir adamdar vızasyz rejımdi zańsyz maqsattarda paıdalanyp jatyr. Biz baqylaýdy kúsheıtkimiz keledi, - dedi ol.
Bılik vızasyz bolý merziminiń qysqarýy týrıster aǵynyna keri áser etpeıdi dep úmittenedi.
2026 jyldyń 1 qańtarynan 10 mamyryna deıin Taılandqa 12,4 mln sheteldik týrıst keldi. Bul ótken jyldyń sáıkes kezeńimen salystyrǵanda 3,43% az.
Týrızm Taıland ekonomıkasynyń negizgi qozǵaýshy kúshteriniń biri bolyp qala beredi. 2019 jyly shetelden kelgen týrısterdiń rekordtyq sany tirkeldi, sol kezde elge shamamen 40 mln adam kelgen.
Osyǵan deıin Taılandta hantavırýsqa baılanysty Ońtústik Amerıkadan kelgender tekserilip jatqanyn jazdyq.
