Taıland sheteldikterdiń zańsyz jer ıelený shemalaryna tosqaýyl qoımaq
ASTANA. KAZINFORM – Taıland bıligi sheteldikterdiń jer ıelenýge qoıylǵan shekteýlerdi jergilikti azamattar men kompanııalardy deldal retinde paıdalaný arqyly aınalyp ótýine qarsy búkil el boıynsha kúresti kúsheıtip jatyr. Osy maqsatta jalpy quny shamamen 14 mlrd batqa (417 mln dollar) baǵalanǵan jer ýchaskelerin satýdy mindetteý kózdelgen. Bul týraly Kazinform agenttiginiń tilshisi habarlaıdy.
Taıland premer-mınıstri Anýtın Charnvırakýl 19 qazanda kúmándi jer ıelený shemalaryna qatysty tergeýdi jedeldetip, jyljymaıtyn múlikpen jasalatyn mámilelerge baqylaýdy kúsheıtý tapsyrylǵanyn málimdedi.
Taılandtyń Jer resýrstary departamentiniń málimetinshe, bılik shetel azamattarynyń atynan jer ıelendi degen kúdikke ilingen 1 397 zańdy tulǵany anyqtaǵan. Bul kompanııalar jalpy aýmaǵy shamamen 875 gektar bolatyn 2 360 jer ýchaskesin baqylaıdy. Olardyń jıyntyq quny 14,01 mlrd batqa baǵalanǵan.
Taıland zańnamasy boıynsha, birqatar erekshelikterdi qospaǵanda, sheteldikterge jerdi tikeleı ıelenýge tyıym salynǵan. Alaıda keıbir sheteldik ınvestorlar bul shekteýlerdi aınalyp ótip, jyljymaıtyn múlikti Taıland azamattarynyń nemese deldal retinde áreket etetin kompanııalardyń atyna rásimdegen.
Anýtın Charnvırakýl tıisti memlekettik organdarǵa táýekeli joǵary ister boıynsha tergeýdi 2026 jylǵy jeltoqsanǵa deıin aıaqtap, zańsyz ıelenilgen jerlerdi satýdy mindetteıtin zańnamany oryndaýdy tapsyrdy. Sonymen qatar bolashaqta osyndaı deldaldyq shemalardyń paıda bolýyna jol bermeý úshin baqylaý júıeleri kúsheıtiledi.
Jańa sharalarǵa sáıkes, qolma-qol aqshamen keminde 2 mln batqa jer satyp alý nemese baǵalaý quny 5 mln battan asatyn jyljymaıtyn múlikke qatysty mámileler qosymsha tekseriledi. Sheteldikterge turmysqa shyqqan Taıland azamattary jer satyp alýǵa jumsalǵan qarajattyń ózderine tıesili ekenin dáleldeýi kerek. Al jyljymaıtyn múlik satyp alatyn kompanııalardyń aktsıonerleri men qarjylandyrý kózderi tekseriledi.
Bul ózgerister Taılandtan jyljymaıtyn múlik satyp alýdy qarastyryp júrgen qazaqstandyqtarǵa da qatysty bolýy múmkin. Ásirese Phýket pen Pattaııa sııaqty tanymal týrıstik baǵyttarda múlikke ınvestıtsııa salatyn azamattar jańa talaptardy eskergeni jón. Jergilikti salalyq esepterge sáıkes, qazaqstandyqtar Phýkettegi turǵyn úı naryǵyndaǵy sheteldik satyp alýshylardyń qatarynda.
Degenmen Taıland zańnamasynda jerge ıelik etý men kondomınıýmnan páter satyp alýdyń ara-jigi ajyratylǵan. Qazaqstan azamattaryn qosa alǵanda, sheteldikter kondomınıýmnan páterdi zańdy túrde satyp ala alady. Ol úshin sheteldikterge tıesili páterlerdiń jalpy aýdany ǵımarattaǵy barlyq turǵyn úı alańynyń 49 paıyzynan aspaýy kerek. Qazirgi tekserýler zańda ruqsat etilgen tártippen satyp alynǵan kondomınıým páterlerine emes, deldaldar arqyly rásimdelgen jer ýchaskelerine baǵyttalǵan.
Taıland qazaqstandyq týrıster arasynda da tanymal baǵyt bolyp qala beredi. Qazaqstan Syrtqy ister mınıstrliginiń málimetinshe, 2025 jyly elge Qazaqstannan shamamen 200 myń týrıst barǵan. Olardyń edáýir bóligi Phýketke barǵan.
Vılla nemese jer telimine quqyǵy bar ózge de jyljymaıtyn múlikti satyp alýdy kózdeıtin qazaqstandyq ınvestorlar úshin bul talaptardyń kúsheıýi menshik quqyǵyn rásimdeý tártibin muqııat tekserýdiń mańyzyn arttyrady.
Eske salaıyq, buǵan deıin Taılandtan táttiler arasyna 4,7 keli esirtki jasyryp alyp kelgen boıjetkenniń sottalǵanyn jazdyq.
