Taıland sheteldik týrısterge jańa tólem engizýdi josparlap otyr
ASTANA. KAZINFORM — Taıland sheteldik týrısterge 450 bat (shamamen 6 myń teńge) kóleminde týrıstik tólem engizýdi josparlap otyr. Bul týraly Kazinform The Nation basylymyna silteme jasap habarlaıdy.
Qazirgi jobaǵa sáıkes, sheteldik týrıster Taılandqa áýe, qurlyq nemese teńiz arqyly kelgenine qaramastan, týrıstik tólem jasaýy qajet bolady.
Alaıda koroldik otbasynyń qonaqtary men úkimettiń resmı qonaqtary, dıplomatııalyq jáne qyzmettik pasport ıeleri, jumys isteýge ruqsaty bar shetel azamattary, shekaralyq ruqsaty bar adamdar, tranzıttik jolaýshylar, ekıpaj músheleri jáne eki jasqa tolmaǵan balalar bul tólemnen bosatylady.
Alymdy tólegen týrıster saqtandyrý tólemi kúshinde bolǵan jaǵdaıda, 30 kún ishinde qaıta aqy tólemeı, Taılandqa birneshe ret kirip-shyǵa alady.
Qazir usynys qoǵamdyq talqylaý kezeńinde. Ol 28 qyrkúıekke deıin Ulttyq týrıstik saıasat komıtetiniń qaraýyna usynylady. Keıin qujat Ulttyq týrıstik saıasat komıtetine qaıta joldanyp, odan soń Mınıstrler kabınetiniń qaraýyna engiziledi.
Bıliktiń málimdeýinshe, týrıstik alym esebinen sheteldik týrısterdi saqtandyrý, týrıstik ınfraqurylymdy damytý, qorshaǵan ortany qalpyna keltirý jáne jergilikti qaýymdastyqtardy qoldaý jumystary qarjylandyrylady. Sondaı-aq bul shara shetel azamattarynyń ótelmegen medıtsınalyq shyǵyndaryna baılanysty memleketke túsetin qarjylyq salmaqty azaıtýǵa múmkindik beredi.
Qazir Taılandta shetel azamattaryna kórsetilgen, ótelmeı qalǵan medıtsınalyq qyzmetterdiń shyǵyny jylyna shamamen 7 mlrd batqa jetedi.
Úkimet týrıstik alymdy 2027 jyldyń birinshi toqsanynda engizýdi josparlap otyr.
Bıliktiń esebinshe, jańa alym bıýdjetke jyl saıyn 10 mlrd battan astam kiris ákelýi múmkin.
Bul bastama týrızm salasynyń alty onjyldyqtan astam ýaqyt boıy turaqty ósýinen keıin qolǵa alynyp otyr. 2019 jyly, COVID-19 pandemııasyna deıin, Taılandqa rekordtyq 39 mln sheteldik týrıst barǵan. Alaıda týrıster sanynyń artýy tabıǵı resýrstarǵa, negizgi týrıstik baǵyttarǵa jáne jergilikti qaýymdastyqtarǵa túsetin salmaqty da kúsheıtti.
Eske salaıyq, buǵan deıin Venetsııada týrıstik alym 30 eýroǵa deıin kóteriletinin habarlaǵan edik.
