Taıland sheteldik týrısterge arnalǵan jańa alymdy engizýdi keıinge qaldyrdy

ASTANA. KAZINFORM — Taılandtyń Týrızm jáne sport mınıstrligi sheteldik týrısterden alynatyn jańa alymdy engizý merzimin keıinge shegerdi. Bul týraly The Nation basylymy habarlady.

Buǵan deıin sheteldik týrısterge arnalǵan alymdy 2025 jyly engizý josparlanǵan bolatyn. Alaıda, mınıstrliktiń assıstenti Chakrapol Tansýtıthamnyń málimdeýinshe, Týrızm jáne sport mınıstri Soravong Thıenthong qazirgi jaǵdaıdy turaqsyz dep eseptep, bastamany keıinge qaldyrý týraly sheshim qabyldaǵan.

– Bizge osy jyldyń tórtinshi toqsanyndaǵy týrızmniń joǵary maýsymynda halyqaralyq týrıstik suranysty kútip, baǵalaý qajet. Sonymen qatar, mınıstrlik alym qurylymyn naqtylaý úshin áli de qosymsha taldaý júrgizedi. Ásirese, shekaradan kirý tásilderine qaraı – qurlyq, teńiz nemese áýe arqyly, – dedi Chakrapol Tansýtıtham.

Jospar boıynsha, alym kólemi:

• áýe kóligimen keletinder úshin — 300 bat (shamamen 4 900 teńge),

• qurlyq nemese teńiz jolymen ótetinder úshin — 150 bat (shamamen 2 450 teńge) bolady.

Jınalǵan qarajat týrıstik ınfraqurylymdy damytýǵa jáne sheteldik qonaqtar úshin saqtandyrý shyǵyndaryn óteýge baǵyttalady.

Aıta keteıik, Taıland premer-mınıstri etıkalyq daýdan keıin qyzmetinen ýaqytsha shettetildi.