Taıland pen Kambodja: Tramptyń beıbitshilikke shaqyrýynan keıin de atys toqtar emes

AQSh prezıdenti Donald Tramp Taıland pen Kambodja bitimge kelýge daıyn ekenin málimdegenine qaramastan, shekaradaǵy áskerı qaqtyǵystar toqtaǵan joq, dep habarlaıdy Kazinform agenttigi DW-ge silteme jasap.

Bul týraly Kambodjanyń Qorǵanys mınıstrligi málimdep, taı áskerıleriniń «bombalaýdy toqtatpaǵanyn jáne ony jalǵastyryp jatqanyn» atap ótti.

Al Bangkokta Taıland premer-mınıstri Anýtın Charnvırakýl Donald Tramppen telefon arqyly sóıleskennen keıin jýrnalısterge qazirgi ýaqytta shekaralyq qaqtyǵys boıynsha eshqandaı bitim bolmaǵanyn aıtty. Onyń sózinshe, atysty toqtatý týraly kelisimdi birinshi bolyp Kambodja buzǵan jáne deeskalatsııa jasaý úshin alǵashqy qadamdy sol el jasaýy tıis.

Eki el arasyndaǵy shıelenistiń jańa kezeńi 8 jeltoqsanda bastaldy. Sol kúni Taılandtyń áskerı-áýe kúshteri Kambodja aýmaǵyndaǵy birqatar «áskerı nysanyna» áýeden soqqy jasady. Sodan beri Bangkok pen Pnompen bir-birin kelisimderdi buzdy dep ózara aıyptap keledi.

Eske sala keteıik, buǵan deıin Donald Tramp telefon arqyly júrgizilgen kelissózderden keıin taraptar bir táýlik ishinde áskerı áreketterdi toqtatýǵa keliskenin málimdegen.

Taıland pen Kambodja arasyndaǵy qaqtyǵys shamamen júz jylǵa jýyq ýaqyttan beri jalǵasyp keledi jáne ótken jazda qaıta ýshyǵa tústi. Qazan aıynyń sońynda AQSh-tyń araǵaıyndyǵymen eki el aımaqta uzaq merzimdi turaqtylyqty qamtamasyz etýge baǵyttalǵan beıbit kelisimge qol qoıǵan edi. 

Aıta ketsek, buǵan deıin Taıland-Kambodja shekarasynda qaqtyǵys qaıta bastalǵanyn habarlaǵanbyz.