Taıland pen Kambodja shekarasynda qarýly qaqtyǵys boldy

ASTANA. KAZINFORM — Beısenbi kúni Taıland pen Kambodja shekarasynda qaqtyǵystyń shıelenisýi jaǵdaıynda oq almasyp, saldarynan 9 beıbit turǵyn qaza taýyp, 14 adam jaraqat aldy, dep habarlaıdy The Nation. 

24 shilde kúni tańerteń Taıland pen Kambodjanyń shyǵys shekarasynda qaqtyǵys bastaldy. Eki el áskerı urysty bastady dep bir-birin aıyptady. Taıland premer-mınıstriniń mindetin atqarýshy Phýmtham Vechaıachaı dıplomatııalyq qarym-qatynas mártebesin tómendetýge, Taılandtyń Kambodjadaǵy elshisin shaqyrtyp alýǵa jáne Kambodja elshisin elden shyǵarýǵa buıryq berdi. 

Jaýap retinde Kambodja Taılandpen dıplomatııalyq qarym-qatynastardy eń tómengi deńgeıge deıin tómendetetinin habarlap, Kambodjanyń Taılandtaǵy elshiliginen barlyq qyzmetkerlerin keri shaqyrdy.

Mamyr aıynda daýly aýmaqta bolǵan qaqtyǵysta Kambodja sarbazynyń qazasynan keıin kórshi elder arasyndaǵy qarym-qatynas kúrt nasharlady. 
Eki eldiń úkimeti bir-biriniń áreketterine jaýap berýge májbúr bolyp jatqanyn málimdedi.

Taıland SІM málimdeýinshe, Kambodja áskerleri Taıland áskerı bazasyn aýyr artıllerııamen atyp, azamattyq nysandarǵa soqqy jasaǵanyn habarlady. Buǵan jaýap retinde Taıland ÁÁK joıǵysh ushaǵy Kambodjadaǵy nysandarǵa soqqy berdi. 

Kambodja bıligi el armııasy ózin-ózi qorǵaý maqsatynda qarsy shabýylǵa shyqqanyn málimdedi.

Kambodja premer-mınıstri Hýn Manet Taılandpen shekaradaǵy jaǵdaıǵa baılanysty BUU Qaýipsizdik keńesiniń shuǵyl otyrysyn ótkizýge shaqyrdy.