Arnaıy avtobýstar men 3 myń qyzmetker: Almatyda Djeı Lo kontsertine daıyndyq bastalyp ketti

ALMATY. KAZINFORM - Almatyda 10 tamyz kúni álemdik pop-juldyzy Djennıfer Lopestiń kontserti ótedi.

Almaty ákimdiginiń málimetinshe, mýzykalyq keshti joǵary deńgeıde ótkizý úshin Ortalyq stadıon daıyndalyp jatyr. Atap aıtqanda, trıbýnalar jóndelip, baspaldaqtar jańartylyp, oryndyqtar ishinara jóndelip jatyr.

- Stadıon aýmaǵynda júrip jatqan kishigirim qurylys jáne jóndeý jumystary 9 tamyzǵa deıin tolyq aıaqtalady. Buǵan deıin stadıonnyń jaryq júıesi jańartylyp, 50-den astam sham aýystyryldy. Qazirgi tańda sahnanyń tehnıkalyq jabdyqtalýy men qaýipsizdik talaptaryna sáıkestigi tekserilýde. Syrtqy dárethanalar jańartyldy, qorshaýlar qalpyna keltirilip, irgeles aýmaq abattandyryldy, - dep habarlady ákimdikten.

Odan bólek sahnanyń tehnıkalyq jabdyqtalýy men qaýipsizdik talaptaryna sáıkestigi tekserilip jatyr.

Jalpy kontsert kezinde qoǵamdyq qaýipsizdikti qamtamasyz etý úshin 2960 qyzmetker jumyldyrylady. Onyń ishinde 2240 polıtsııa qyzmetkeri, 600 áskerı qyzmetker, 120 jeke kúzet agenttigi ókilderi jáne 300 erikti bar.

Mýzykalyq keshke keletin qonaqtardyń qaýipsizdigin qamtamasyz etý maqsatynda stadıonǵa kiretin 26 baqylaý beketiniń árqaısysynda metall detektorlar men 52 qol skanerleri ornatylady.

- Stadıon aýmaǵy tórt negizgi fan-aımaqqa bólinedi, árqaısysy 2–3 myń adamǵa arnalǵan. Bul kórermenderdiń qozǵalysyn baqylaý men tártip saqtaýǵa múmkindik beredi.Stadıon janyna qosymsha 100-ge jýyq bıodárethana qoıylady. «Taza Qazaqstan» aktsııasy aıasynda eriktiler tazalyq jumystaryn júrgizip, is-shara barysynda tazalyqty qamtamasyz etedi, - dep túsindirdi qala basshylyǵy.

Stadıon aýmaǵynda jedel járdem jáne órt sóndirý kólikteri kezekshilik etpek. Sondaı-aq adamdarǵa yńǵaıly bolý úshin arnaıy baǵyttar boıynsha 50 avtobýs jumys isteıtin bolady.

Eske salaıyq, 1 tamyz kúni amerıkalyq pop-juldyz Djennıfer Lopes «Astana Arena» stadıonynda jeke kontsert berdi.