Taıland pen Kambodja atysty toqtatý rejımin ustanýǵa beıildilikterin rastady

ASTANA. KAZINFORM – Taıland pen Kambodja arasyndaǵy kelissózder týraly Qytaı Syrtqy ister mınıstrliginiń Shanhaıda QHR Syrtqy ister mınıstriniń orynbasary Sýn Veıdýn men eki el ókilderiniń kezdesýi qorytyndysy boıynsha taratqan málimdemesinde aıtyldy, dep jazady Anadoly.

Onda taraptardyń jaǵdaıdy báseńdetýdegi Beıjińniń úlesin joǵary baǵalaǵany da atap ótilgen. Kezdesý beıresmı keńes sıpatynda, «jyly, dostyq ári qolaıly atmosferada» ótkeni habarlandy.

QHR Syrtqy ister mınıstrliginiń málimetinshe, kelissózder Qytaıdyń Kambodja men Taıland arasyndaǵy kelispeýshilikterdi beıbit jolmen sheshýge baǵyttalǵan turaqty ári syndarly kúsh-jigeriniń bir bóligi sanalady.

Taıland pen Kambodja arasyndaǵy shekaradaǵy shıelenis

Ońtústik-Shyǵys Azııada ornalasqan jáne 817 shaqyrymdyq shekaramen bólingen Taıland pen Kambodja arasyndaǵy aýmaqtyq daýlar burynnan bar. 28 mamyrda shekara kelisimi buzylǵannan keıin óńirde qysqa merzimdi qaqtyǵys bolyp, eki el armııalary máseleni beıbit jolmen sheshýge ýaǵdalasqan edi. Alaıda shamamen eki aı ótken soń – 24 shildede shekara mańynda jańa qaqtyǵystar bolyp, eki taraptan 32 adam qaza tapty.

Osyǵan baılanysty Kambodja premer-mınıstri Hýn Manet pen Taılandtyń ýaqytsha premer-mınıstri Pýmtam Vechaıachaı Malaızııa astanasy Kýala-Lýmpýrda malaızııalyq premer Enver Ibragımniń deldaldyǵymen kezdesý ótkizdi.

Kelissózderden keıin taraptar bitimgershilik týraly kelisimge qol jetkizgenderin jarııalady.