Taıland pen Kambodja arasyndaǵy qaqtyǵys jalǵasyp jatyr

ASTANA. KAZINFORM – Seısenbi kúni Kambodja men Taıland arasyndaǵy daýly shekara boıyndaǵy qaqtyǵystar ýshyǵyp ketti. Eki tarap ta óz egemendigin qorǵaýdan bas tartpaıtynyn málimdedi, dep habarlaıdy BBC. 

Taılandta áskerıler bes shekaralas provıntsııada qaqtyǵys bolyp jatqanyn jáne AQSh Áskerı-teńiz kúshteriniń Trat provıntsııasyndaǵy kambodjalyq sarbazdardy qýyp shyǵarý operatsııasy jaqyn arada aıaqtalady dep kútiletinin málimdedi. 

Taıland áskerıleriniń málimdeýinshe, Kambodja taı kúshterine shabýyl jasaý úshin artıllerııa, zymyran tasyǵyshtar jáne ushqyshsyz ushý apparattaryn paıdalanyp jatyr.

- Taıland óziniń egemendigi men aýmaqtyq tutastyǵyn qorǵaýǵa bel býdy, sondyqtan qajet bolǵan jaǵdaıda áskerı áreketter qabyldanýy tıis, - dep málimdedi Taıland Qorǵanys mınıstrliginiń ókili Sýrasant Kongsırı. 

Al Jazeera habarlaýynsha, Kambodjada 30-dan astam sheteldik elshi men BUU ókilderiniń qatysýymen shuǵyl brıfıng ótti. 

ASEAN-nyń atysty toqtatý baqylaýshylary oǵan vırtýaldy rejımde qatysty.

Kezdesý barysynda Kambodja Taılandtyń qaqtyǵysty qaıta bastady degen málimdemelerin joqqa shyǵaryp, «óziniń berik ustanymy men atysty toqtatýdy saqtaýǵa degen mindettemesin joǵary jaýapkershilik pen izgi nıetpen rastaǵanyn» málimdedi. 

Kambodja Qorǵanys mınıstrligi dúısenbiden beri toǵyz beıbit turǵyn qaza taýyp, taǵy 20 adam aýyr jaraqat alǵanyn málimdep, Taılandty «qatygez jáne zańsyz áreketter» jasady dep aıyptady.

Óz kezeginde Taıland úsh taı sarbazynyń qaza tapqanyn málimdedi. Taǵy 29 adam jaraqat aldy. 

Eki el de shekaralas aýdandardan júzdegen myń adam evakýatsııalanatynyn málimdedi. 

Dúısenbide bastalǵan qaqtyǵystar shildedegi shaıqastan beri eń aýyry boldy. Eki el bes kún boıy zymyran shabýyldary men aýyr artıllerııalyq atystar almasty. Sol kezde 48 adam qaza taýyp, 300 myńnan astam adam úılerin tastap ketýge májbúr boldy.

Eske sala ketsek, shilde aıynda Taıland pen Kambodja arasyndaǵy atysty toqtatý kelisimi kúshine endi.

Qazan aıynyń sońynda Taıland premer-mınıstri Anýthın Chanvırakýn jáne Kambodja úkimetiniń basshysy Hýn Manet AQSh prezıdenti Donald Tramptyń qatysýymen Kýala-Lýmpýrda ótken Ońtústik-Shyǵys Azııa memleketteri qaýymdastyǵy (ASEAN) sammıtiniń aıasynda beıbit kelisimge qol qoıdy. 

Alaıda qarashanyń basynda Taıland premer-mınıstri eki taı sarbazynyń qarsy mınadan qaza tabýynan keıin kelisim boıynsha barlyq sharalar toqtatylatynyn málimdedi.

QR SІM Taıland pen Kambodja shekarasyndaǵy qarýly qaqtyǵystar kýrorttyq aımaqtardan alys jerde bolyp jatqanyn, sondyqtan azamattarymyzǵa alańdaýdyń qajeti joq ekenin málimdedi.