Taıland parlamenti 2026 jyly taratylady
ASTANA. KAZINFORM — Saılaý sáýir nemese mamyr aılarynda ótýi múmkin, dep habarlaıdy TASS.
Taıland parlamentiniń Ókilder palatasy (tómengi palata) 2026 jylǵy 31 qańtarda taratylmaq. Bul týraly koroldik parlamentinde jańa úkimet baǵdarlamasyn tanystyra otyryp, saıası málimdeme jasaǵan Taıland premer-mınıstri Anýthın Chanvırakýn habarlady dep málimdedi Thai PBS telearnasy.
— Biz 1 qazandy (úkimet jumysynyń) birinshi kúni dep esepteımiz, al tórt aıdan keıin, 31 qańtarda, Ókilder palatasy taratylady, — dedi ol.
Premerdiń aıtýynsha, ózi basqaryp otyrǵan úkimet ýaqytsha sıpatqa ıe jáne qysqa merzim ishinde turaqty damýǵa berik irgetas qalaý úshin qurylǵan. Osylaısha, kezekten tys parlament saılaýy 2026 jyldyń sáýir nemese mamyr aılarynda ótýi múmkin.
Chanvırakýn basymdyq beriletin negizgi maqsattar retinde Kambodjamen shekaradaǵy qaqtyǵysty beıbit retteý, Taılandtyń týrıstik salasyn qalpyna keltirý jáne halyqtyń ál-aýqatyn arttyrý úshin negizgi taýarlar men qyzmetterdiń baǵasyn tómendetýdi atady. Jańa kabınet sondaı-aq monarhııaǵa negizdelgen demokratııalyq júıeniń tutastyǵyn saqtaı otyryp, konstıtýtsııaǵa túzetýler engizý máselesi boıynsha referendým ótkizý protsesin qoldaýǵa mindettendi.
Taıland parlamenti 5 qyrkúıekte «Phýmchaıthaı» («Taılandtyń maqtanyshy») partııasynyń jetekshisi, 58 jastaǵy Anýthın Chanvırakýndy jańa premer-mınıstr etip bekitti. Buǵan deıin ol koalıtsııalyq úkimet quramynda premer-mınıstrdiń orynbasary ári ishki ister mınıstri qyzmetin atqarǵan. 2019 jyldan 2023 jylǵa deıin Chanvırakýn densaýlyq saqtaý mınıstri bolyp, eldegi pandemııaǵa qarsy kúresti basqardy. Jańa úkimet aldaǵy tórt aı jumys istep, sodan keıin premer-mınıstr jalpy saılaý ótkizý úshin parlamentti taratady. Bul kelisim buryn oppozıtsııalyq Halyq partııasymen jasalǵan. Dál osy partııa Chanvırakýnnyń kandıdatýrasyn parlamenttegi daýys berýde qoldap, alaıda jańa kabınettegi oryndardan bas tartqan.
Jańa premer-mınıstrdi saılaý qajettiligi 2025 jylǵy 29 tamyzda Taıland Konstıtýtsııalyq sotynyń sheshiminen keıin týyndady. Sot burynǵy premer-mınıstr (2001–2006 jj.) Taksın Chınavattyń qyzy Phethongthan Chınavatty qyzmetinen bosatty. Ol Kambodjanyń burynǵy premer-mınıstri (1998–2023 jj.), qazirgi Senat tóraǵasy Hýn Senmen bolǵan telefon áńgimesiniń jazbasy syrtqa shyǵyp ketken is boıynsha «etıkalyq normalardy óreskel buzdy» dep tanyldy. Premer-mınıstrmen birge búkil mınıstrler kabıneti de otstavkaǵa ketti. Bul úkimet 2023 jylǵy mamyrdaǵy parlamenttik saılaý qorytyndysy boıynsha qurylǵan koalıtsııany usynǵan edi.
Aıta ketelik Taılandta jańa premer-mınıstr taǵaıyndalǵany týraly jazǵan edik.