Taıland ІІM: 30 qabatty ǵımarattyń qulaý sebebi jeti kún ishinde belgili bolady

ASTANA. KAZINFORM — Taılandtyń ishki ister mınıstri Anýtın joıqyn zilzala kezinde opyrylyp qulaǵan 30 qabatty ǵımaratqa qatysty tergeýdiń nátıjesi jeti kún ishinde belgili bolatynyn málimdedi. Bul týraly Lianhe Zaobao basylymy habarlady.

30 naýryz kúni Anýtın arnaıy tergeý komıssııasy qurylǵanyn, tekserý jumysy jeti kún ishinde aıaqtalatynyn aıtty.

— Taıland tez arada ǵımarattyń qulaý sebebin anyqtaıtyn bolady, — dedi ol.

Basylymnyń jazýynsha, Taıland Ulttyq aýdıt agenttiginiń Bangkokta salynyp jatqan jańa keńsesi (30 qabatty) 28 naýryz kúni Mıanmadaǵy joıqyn jer silkinisi kezinde opyrylyp túsken.

Belgili bolǵandaı, bul jobaǵa bıýdjetten 2,1 mıllıard bat bólingen, al qurylys kelisimi Taılandtyń Ulttyq aýdıt agenttigi jáne Italııa–Taıland damý konsortsıýmy men Qytaı temirjol qurylys korporatsııasynyń onynshy bıýrosy arasynda jasalǵan.

Taılandtaǵy Qytaı elshisi Han Chjıtsıan 30 naýryz kúni Qytaıdyń Tótenshe jaǵdaılar mınıstrliginiń sarapshylarymen birge Anýtınmen kezdesti.

Kezdesýden keıin Anýtın qytaılyq sarapshylardyń qulaǵan ǵımarattyń ornyn kózben sholyp qaıtqanyn aıtty. Ol sondaı-aq qytaılyq merdigerlerge oqıǵa ornyna kirýge ruqsat berilmegenin atap ótti.

— Jer silkinisiniń qýaty 7,8 balǵa jetkenmen, Bangkoktaǵy ǵımarattardyń 95%-dan astamy aman qaldy. Tek Ulttyq aýdıt agenttiginiń ǵımaraty ǵana jermen-jeksen bolyp qırady. Bul — jańa ǵımarat, sondyqtan jer silkinisine shydaýǵa tıis edi, — dedi Anýtın.

Onyń aıtýynsha, tergeý sáýletshige, qadaǵalaýshyǵa jáne merdigerge baǵyttalady. Qurylysqa jaýapty taı jáne qytaı kompanııalary óz mindetterin oryndamaǵany úshin jaýapkershilikke tartylýǵa tıis.

Sondaı-aq, tórt qytaı azamatynyń zilzaladan keıin qırandy mańyndaǵy konteınerden 32 qujatty alyp ketpek bolǵany anyqtalǵan. Basylymnyń habarlaýynsha, Bangkok polıtsııa basqarmasy basshysynyń orynbasary Napo olardan jaýap alynǵanyn habarlady.

Onyń aıtýynsha, Qytaı azyamattarynyń jumys ruqsaty bar jáne olar Italııa–Taıland damý konsortsıýmyna tıesili kompanııada jumys isteıdi.

Naponyń bergen aqparatyna sáıkes, bul qujattarda bas merdiger men qosymsha merdigerler týraly egjeı-tegjeıli málimetter bolǵan. Polıtsııa qujattardy tárkilep, Qytaı azamattaryn suraqtan keıin bosatqan.

Qytaı azamattary polıtsııaǵa bergen túsiniktemelerinde qujattardy saqtandyrý tólemderine ótinish daıyndaý úshin alyp ketpek bolǵanyn aıtyp aqtalǵan.

Sondaı-aq, China Digital Times  saıtynyń jazýynsha, ǵımarat qulaǵannan keıin Qytaı temirjol qurylys korporatsııasy onynshy bıýrosynyń resmı saıty men áleýmettik jeli akkaýnttarynan qurylys jobasyna qatysty buǵan deıin jarııalanǵan aqparattar typ-tıpyl óshirilgen.