Taıland koronavırýsqa baılanysty 18 elge vıza berýdi toqtatty

BANGKOK. QazAqparat – Sársenbi kúni Taılandtyń ishki ister mınıstri 18 memlekettiń elge kirýine vıza berýdi toqtatqanyn málimdedi. Onyń arasynda Qazaqstan da bar. Bul týraly Reuters agenttigine silteme jasap QazAqparat habarlaıdy.

Buǵan deıin 18 el men aýmaqtyń azamattary Taılandtyń ımmıgratsııalyq pýnktine kele salyp, vıza alý úshin tólqujat nemese jolaýshy qujattaryn paıdalana alatyn.

Bul 18 memlekettiń tizimine Bolgarııa, Býtan, Qytaı (Taıvandy qosa alǵanda), Kıpr, Efıopııa, Fıdjı, Grýzııa, Úndistan, Qazaqstan, Malta, Meksıka, Naýrý Respýblıkasy, Papýa-Jańa Gvıneıa, Rýmynııa, Reseı, Saýd Arabııasy, Ózbekstan jáne Vanýatý Respýblıkasy kirgen.

Sondaı-aq mınıstr Ońtústik Koreıa, Italııa jáne Gonkong azamattary da vıza ala almaıtynyn qosyp ótti.

Eske sala ketsek, keıin QR Syrtqy ister mınıstrliginiń resmı ókili Aıbek Smadııarov Taıland qazaqstandyqtardyń kelip-ketýine shekteý qoıý jóninde túsinikteme berdi.

«Qazaqstandyq birqatar BAQ-ta Taıland bıligi koronavırýstyń taralýynan 18 el, sonyń ishinde Qazaqstan azamattarynyń elge kirý tártibin qatańdatty degen aqparat jarııalandy. Osyǵan qatysty taı tarapynan resmı aqparat kelip túspegenin habarlaımyn. Bizdiń Bangkoktaǵy elshiligimiz Taıland Syrtqy ister mınıstrligimen baılanysyp, bul másele taı quzyretti organdarynyń qaraýynda jatqanyn jáne atalmysh ereje kúshine enbegenin anyqtady», - málim etti Aıbek Smadııarov.