Taıland Koroli Qazaqstan Elshisin qabyldady

ASTANA. QazAqparat - 15 sáýirde Bangkok qalasynda Taıland Koroli Uly Mártebeli Maha Vachıralongkorn Bodınthrathepphaıavarangkýn Qazaqstan Respýblıkasynyń Elshisi Marat Esenbaevty resmı qabyldady. Bul týraly QR SІM baspasóz qyzmeti habarlady.

Kezdesý barysynda saıası jáne saýda-ekonomıkalyq, onyń ishinde týrızm, mádenıet jáne sport salalaryndaǵy qazaqstandyq-taı qarym-qatynastarynyń damý qarqyny talqylandy.

M. Esenbaev Korolge Taılandta qyzmet atqarǵan kezeńi 1998-2000 jáne 2013-2017 jyldarynda kórsetken qoldaýy úshin alǵysyn bildirdi.

Taıland Koroli Elshige ekijaqty qarym-qatynastardyń damýyna qosqan úlesi úshin alǵys aıtyp, Qazaqstan men Taıland arasyndaǵy qarym-qatynastardyń damýynda Qazaqstan Prezıdenti Nursultan Nazarbaevtyń róline erekshe nazar aýdardy.

«Qazaqstan men Taıland eki el arasyndaǵy qatynastardy damytýda jáne halyqtar arasyndaǵy dostyqty nyǵaıtýda eleýli progreske qol jetkizdi. Men Qazaqstan Respýblıkasynyń Prezıdenti N. Nazarbaevty asa qurmetteımin jáne onyń qazaqstandyq-taı yntymaqtastyǵynyń serpindi damytýǵa qosqan úlesi úshin alǵysymdy bildiremin», - dedi Korol Rama H.

Kezdesý sońynda Taıland Koroli Qazaqstan Prezıdentine izgi tilekterin joldady, al dostas Qazaqstan halqyna ıgilik pen gúldený tiledi.