Taıland Qazaqstanmen aradaǵy áýe qatynasyn arttyrýǵa múddeli
ASTANA. QazAqparat - Astanada Qazaqstan men Taılandtyń avıatsııa bıliginiń jáne áýe kompanııalary (Air Astana, SCAT, Thai Airways) ókilderiniń qatysýymen ekijaqty kezdesý ótti, dep habarlaıdy QazAqparat.
«Kelissózderdi Taılandtyń avıatsııalyq bılik organynyń Bas dırektory Chýla Sýkmanop pen QR IDM Azamattyq avıatsııa komıtetiniń tóraǵasy Talǵat Lastaev júrgizdi. Kezdesý barysynda taraptar kod-sher yntymaqtastyǵyn paıdalaný, eki jaqtyń aýmaǵynda ushý ári qoný pýnktteri, ushý qaýipsizdigi jáne basqa da máselelerdi talqylady», - delingen QR IDM málimetinde.
Qazirgi ýaqytta eki el arasyndaǵy áýe baılanysy «Eır Astana» kompanııasy aptasyna 5 ret oryndaıtyn «Almaty - Bangkok» (qysta aptasyna eki reıs qosylady) jáne aptasyna 3 ret oryndaıtyn «Astana - Bangkok» turaqty tikeleı reısteri arqyly ornatylǵan.
Júrgizilgen kelissózder nátıjesinde, qazaqstandyq «Eır Astana» kompanııasy úshinshi elderdiń áýe kompanııalarymen kod-sher ýaǵdalastyqtar jasaý quqyǵyna ıe boldy. Jańa tártip qazaqstandyq jolaýshylarǵa osy baǵytta jańa múmkindikter ashyp, elimizdiń tranzıttik áleýetin odan ári damytýǵa yqpal etedi.
