Taıland Qazaqstan azamattaryna vıza berýin toqtatty

NUR-SULTAN. QazAqparat - Qazaqstannyń Bangkok qalasyndaǵy Elshiliginiń aqparatyna sáıkes, Taıland Koroldiginiń Úkimeti koronavırýs COVID-19 pandemııasyna baılanysty 18 eldiń, sonyń ishinde Qazaqstan azamattaryna el aýmaǵyna kelgende beriletin vızalaryn (Visa on Arrival) rásimdeý múmkindigin toqtatty.

Bul jaıynda QR Syrtqy ister mınıstrliginiń Telegram paraqshasynda jarııalanǵan aqparatta aıtylǵan, dep habarlaıdy QazAqparat tilshisi.

Vedomstvo málimetinshe, Taılandqa barý úshin Qazaqstan azamattary shetelderdegi Koroldiktiń dıplomatııalyq ókildikteriniń birinde kirý vızasyn rásimdeýi qajet. Taı tarapynyń bul sheshimi 2020 jylǵy 13 naýryzdan 30 qyrkúıekke deıin qoldanysta bolady jáne koronavırýstyń taralý deńgeıi tómendegennen keıin qaıta qaralady.

«Osyǵan qaraı, QR azamattaryna osy elge josparlanǵan saparlaryna aldyn-ala daıyndalý qajettiligine nazar aýdaramyz»,- dedi mınıstrlikten.