Taıland Qazaqstan azamattarynyń vızasyz júrý merzimin qysqartty
ASTANA. KAZINFORM — Taıland Koroldigi birqatar eldiń azamattary úshin vızasyz júrý merzimin qysqartty. Bul erejeniń Qazaqstan azamattaryna da qatysy bar.
QR Syrtqy ister mınıstrliginiń resmı ókili Janbolat Úsenovtyń aıtýynsha, Taıland Mınıstrler kabınetiniń tıisti sheshimi 2026 jylǵy 15 qyrkúıekte kúshine endi.
— Іs júzinde Taıland bıligi eki jyl buryn qabyldaǵan, onyń negizinde Qazaqstandy qosa alǵanda 93 memleket pen aýmaqtyń azamattary úshin biryńǵaı 60 kúndik vızasyz rejım engizilgen birjaqty sheshiminiń kúshin joıdy. Taı tarapy atalǵan sheshimniń kúshin joıý ulttyq qaýipsizdik pen ekonomıkalyq faktorlardy eskere otyryp, kóshi-qon saıasatyn jańartý qajettigimen baılanysty ekenin habarlady, — dep túsindirdi resmı ókil elordada ótken aptalyq brıfıngte.
2026 jylǵy 15 qyrkúıekten bastap Qazaqstan azamattaryna qatysty buryn qol qoıylǵan QR Úkimeti men Taıland Koroldiginiń úkimeti arasynda jasalǵan Ulttyq pasport ıelerin vızalyq talaptardan bosatý týraly kelisim qoldanylady.
Atalǵan kelisimge sáıkes, Qazaqstan azamattary Taıland aýmaǵynda elge kirgen kúnnen bastap, 30 kúntizbelik kúnge deıin vızasyz júre alady. Bul rette vızasyz júrýdiń jıyntyq merzimi árbir 180 kúndik kezeń ishinde 90 kúntizbelik kúnnen aspaýy tıis.
— Qysqasha aıtqanda, budan bylaı Qazaqstan azamattarynyń Taılandta vızasyz bolý merzimi 60 kúnnen 30 kúnge qysqarady. Osyǵan baılanysty, Taılandqa barýdy josparlap otyrǵan Qazaqstan azamattaryna kóshi-qon rejımindegi atalǵan ózgeristerdi eskerýdi usynamyz. Elde 30 kúnnen astam bolý qajet bolǵan jaǵdaıda, tıisti vızany aldyn-ala rásimdeý qajet, — dedi Janbolat Úsenov.
Buǵan deıin QR SІM resmı ókili Grýzııada ruqsatsyz jumys istegender 5 jylǵa deıin elden shyǵarylýy múmkin ekenin aıtqan edi.
Oǵan qosa, Qazaqstan azamattary Indonezııaǵa vızasyz saıahattaı alady.
