Taıland Kambodjamen shekarada áskerı jaǵdaı engizdi

ASTANA. KAZINFORM — Juma kúni Taılandtyń Shekarany qorǵaý qolbasshylyǵy Chanthabýrı men Trat provıntsııalaryndaǵy segiz aýdanda áskerı jaǵdaı engizilgenin jarııalady, dep habarlaıdy The Nation. 

— Kambodja Taıland aýmaǵyna shekara boıymen basyp kirý úshin kúsh pen qarý qoldanǵandyqtan, eldi syrtqy qaýipten qorǵaý maqsatynda ásker engizý qajettiligi týyndady, — delingen resmı málimdemede.

2025 jylǵy 24 shildede Taıland pen Kambodja shekarasynda avıatsııa men artıllerııa qoldanylǵan qaqtyǵystar bastaldy. Eki tarap ta qaqtyǵysty bir-birinen kóredi, árqaısysy qarsylasyn arandatýshylyq áreketterge barǵan dep aıyptap otyr.

Taıland bıligi qaqtyǵys aımaǵynan 100 myńnan astam adamdy ýaqytsha panalaý oryndaryna evakýatsııalaǵanyn habarlady. Kambodja tarapynan da 4 myńnan astam adam shekara mańyndaǵy úılerin tastap ketýge májbúr bolǵan.

Qos taraptan da adam shyǵyny týraly málimetter bar.

Juma kúni Nıý-Iork ýaqytymen 15:00–de BUU Qaýipsizdik Keńesiniń Taıland pen Kambodja shekarasyndaǵy jaǵdaıǵa baılanysty jabyq tótenshe otyrysy josparlanǵan.

Buǵan deıin Kambodja shekaradaǵy qarýly qaqtyǵysqa baılanysty BUU-ny shuǵyl otyrys ótkizýge shaqyrǵan bolatyn.

Aıta ketelik Taıland Kambodjamen qaqtyǵys kezinde 14 azamattyń qaza tapqanyn málimdedi.