Taıland Kambodjamen dıplomatııalyq qatynas mártebesin tómendetti

ASTANA. KAZINFORM – 23 shildede shekaralyq aımaqta mına jarylyp, Taıland sarbazdary zardap shekti. Kambodja tarapy Taılandtyń aıyptaýyn joqqa shyǵardy, dep habarlaıdy Sınhýa aqparat agenttigi.

Premer-mınıstrdiń keńsesi jarııalaǵan málimdemege sáıkes, Taıland premer-mınıstriniń mindetin atqarýshy Phýmtham Vechaıachaı dıplomatııalyq qarym-qatynas mártebesin tómendetýge, Taılandtyń Kambodjadaǵy elshisin shaqyrtyp alýǵa jáne Kambodja elshisin elden shyǵarýǵa buıryq berdi.

- Taıland Kambodjamen ekijaqty qarym-qatynas deńgeıi týraly máseleni qaıta qaraýdy jalǵastyrady, - delingen qujatta.

Budan bólek, Phýmtham Vechaıachaı eldiń Syrtqy ister mınıstrligine Kambodjaǵa osy oqıǵaǵa baılanysty narazylyq notasyn jiberýdi de tapsyrdy.

Taıland armııasynyń aqparatynsha, shekara aımaǵynda patrýldeý kezinde mına jarylysynan bes sarbaz zardap shekken, olardyń bireýi aıaǵynan aýyr jaraqat aldy. Ótken aptada daýly aımaqtyń mańynda osyǵan uqsas mına jarylysynan Taılandtyń úsh sarbazy jaraqat alǵan bolatyn.

Taıland tarapynyń ókilderi mınalar jaqynda ǵana qoıylǵanyn málimdep, Kambodjany jaıaý áskerge qarsy qoıylatyn mınalarǵa tyıym salý konventsııasyn (Ottava konventsııasy) buzdy dep aıyptady.

Taıland-Kambodja shekarasyndaǵy jaǵdaı mamyr aıynyń sońynda daýly shekara aımaǵynda eki jaq arasynda qysqa atys bolyp, Kambodja sarbazynyń qaza bolýynan keıin shıelenisken kúıde qaldy.

Kambodja sársenbi kúni Taıland áskerleri mınanyń jarylysynan zardap shekti degen Taılandtyń aıyptaýlaryn joqqa shyǵaryp, oqıǵa Taıland tarapynyń ózara kelisilgen patrýldik marshrýttardan aýytqyǵandyqtan bolǵanyn málimdedi.

Memlekettik hatshynyń orynbasary jáne Kambodja Qorǵanys mınıstrliginiń baspasóz hatshysy general-leıtenant Malı Socheata atap ótkendeı, qorǵanys vedomstvosy 23 shildede mına jarylysynan bes taı sarbazynyń jaraqat alýyna baılanysty Taıland tarapynyń negizsiz aıyptaýlaryn tolyǵymen joqqa shyǵarady.

- Kambodja Taıland tarapyna osy aýdandarda anyqtalmaǵan kóptegen mınalar men jarylǵysh soǵys qaldyqtarynyń bar ekenin birneshe ret eske saldy jáne Taıland tarapyn 2000 jylǵy ózara túsinistik týraly memorandýmda kózdelgen ózara kelisilgen patrýldeý marshrýttaryn buzýdan aýlaq bolýǵa shaqyrdy, - dep atap ótti resmı ókil óz málimdemesinde.

Malı Socheata Kambodjanyń Qorǵanys mınıstrligi men Koroldik qarýly kúshteri Kambodja qarýly kúshteri Kambodja úkimetiniń Taılandpen shekara máselesin beıbit joldarmen jáne halyqaralyq quqyq negizinde sheshýge qatysty ustanymyn tolyq qoldaıtynyn taǵy qýattaǵanynyn qosyp ótti.

Buǵan deıin sheteldikterge 1 mıllıon dollarǵa «altyn vıza» bergisi keletini týraly jazǵan bolatynbyz.