Taıland Kambodjamen beıbitshilik kelisimin toqtatpaq
ASTANA.KAZINFORM - Taıland AQSh-tyń deldaldyǵymen Kambodjamen jasalǵan atysty toqtatý týraly kelisimdi toqtatady. Taıland premer-mınıstri eki taı sarbazynyń qarsy mınadan qaza tabýynan keıin kelisim boıynsha barlyq sharalar toqtatylatynyn málimdedi, dep habarlaıdy Associated Press.
Elder arasyndaǵy shıelenis áli de jalǵasyp keledi: shildedegi atysqa deıin de, odan keıin de jańa mına jarylystary tirkeldi, sonyń ishinde tamyz aıynda shekara aımaǵyn patrýldeý kezinde úsh taı sarbazy jaraqat aldy.
- Ulttyq qaýipsizdigimizge qarsy dushpandyq biz kútkendeı basylǵan joq, - dedi premer-mınıstr Anýtın Chanvırakýn.
Onyń aıtýynsha, atysty toqtatý týraly kelisim boıynsha barlyq áreketter Taıland talaptary oryndalǵanǵa deıin toqtatylady. Premer-mınıstr Bangkoktyń talaptaryn naqtylamady, al Kambodja jaǵy áli resmı jaýap bergen joq.
Kelisimge sáıkes, Taıland tutqynda otyrǵan 18 Kambodja áskerı qyzmetkerin bosatýy kerek, sondaı-aq eki tarap ta aýyr qarýdy alyp ketýge jáne shekara aımaqtaryn mınasyzdandyrýǵa mindetti.
Taıland Koroldik armııasynyń málimeti boıynsha, Sısaket provıntsııasynda patrýldeý kezinde serjant mınaǵa túsip, oń aıaǵynan aıyryldy, al ekinshi sarbaz jarylys tolqynynan keýdesinen jaraqattandy. Ekeýi de aýrýhanada. Qorǵanys mınıstri Nattafon Nakpanıt armııa mınanyń eski nemese jaqynda ornatylǵanyn anyqtap jatqanyn aıtty. Ol sondaı-aq Taıland osy aptanyń sońyna josparlanǵan kambodjalyq tutqyndardy bosatý isin keıinge qaldyryp jatqanyn qosa aıtty.
Eki tarap ta qarýsyzdandyrý protsesinde biraz ilgerileýshilikter bolǵanyn habarlady, biraq Taıland Kambodjany mınadan tazartýǵa kedergi keltirdi dep aıyptady. Jaýap retinde Pnompen kelisimniń barlyq sharttaryn, sonyń ishinde mınadan tazartý mindettemelerin qatań saqtaıtynyn málimdeıdi jáne Taılandty óz áskerlerin múmkindiginshe tezirek bosatýǵa shaqyrady. Taıland óz kezeginde Kambodjany jańa mınalardy ornalastyrdy dep aıyptaıdy, al Pnompen muny úzildi-kesildi joqqa shyǵarady.
Aıta ketý kerek, Taıland pen Kambodja premer-mınıstrleri buǵan deıin Kýala-Lýmpýrda ótken Ońtústik-Shyǵys Azııa elderi qaýymdastyǵynyń sammıti aıasynda AQSh prezıdenti Donald Tramptyń deldaldyǵymen jasalǵan «beıbitshilik kelisimine» qol qoıǵan bolatyn.