Taıland astanasy Bangkok birte-birte sý astyna ketýde
ASTANA. 27 qazan. QazAqparat - Taıland astanasy Bangkok birte-birte sý astyna ketýde, dep habarlady bnews.kz caıty.
Qazirgi ýaqytta qalanyń soltústigindegi Don Mýang aýdanynyń 90%-yn, sondaı-aq Bang Plat aýdanynyń 70%-yn sý basqan. Oǵan qosa Vang Thong pen Lat Prao aýdandary da sý astyna ketýde. Elordanyń batys aımaqtary da múshkil jaǵdaıda, dep habarlaıdy «Oko planety».
Sý astynda qalǵan Tavı Vattana aýdanynan halyq qaýipsiz jerge kóshirile bastady. Qalanyń taǵy 19 aýdanynda bıliktiń halyqty jedel túrde qaýipsiz jerge kóshirý týraly buıryǵy kúshine engen. Turǵyndarǵa qaladan ketip, evakýatsııalyq ortalyqtardy panalaýǵa keńes berildi.
Mamandardyń pikirinshe, aldaǵy úsh kúnde Bangkoktyń 50 aýdanynyń kóbi sý astynda qalýy múmkin. Keıbir málimetterge sáıkes, qalany jappaı sý basý senbi kúni jergilikti ýaqyt boıynsha saǵat 18:00-de ásirese kúshti bolady. Sol kezde Chao Praı ózeniniń deńgeıi 2,65 metrge jetedi, bul gıdrotehnıkalyq bógetterden 15 santımetrge joǵary.
Esterińizge sala keteıik, sońǵy 50 jylda birinshi ret qaıtalanyp turǵan shilde aıynan qyrkúıekke deıin tolassyz jaýǵan jaýyn-shashyn Taılandtyń soltústik, soltústik-shyǵys jáne ortalyq provıntsııalaryn apatty jaǵdaıǵa dýshar etti. Qazir eldiń 76 provıntsııasynyń 28-in sý basyp qalǵan. Taılandtaǵy tabıǵı apattan 373 adam qurban bolyp, 9,5 mln-ǵa jýyq halyq zardap shekti. Taıland qarjy mınıstrligi memleketke keltirilgen shyǵyn kólemin ázirge 6 mlrd. dollar kóleminde baǵalap otyr.
