Taıland Astanada ótetin AÓSShK VI Sammıtine qatysýdy josparlap otyr - QR SІM
Kezdesý barysynda Premer-mınıstr dıplomatııalyq qatynastardyń 30 jyldyǵymen quttyqtap, Qazaqstan men Taıland arasyndaǵy senimdi áriptestik baılanystardy atap ótti.
General Praıýt Chan-ocha elderimizdiń óńirlik jáne jahandyq qaýipsizdikti qamtamasyz etýdegi ustanymdarynyń uqsastyǵyn aıtty. Osy úderistegi Azııadaǵy ózara is-áreket jáne senim sharalary jónindegi keńestiń (AÓSShK) joǵary rólin eskere otyryp, Taıland Astanadaǵy AÓSShK 6-shy Sammıtine qatysýdy josparlap otyr.
Sonymen qatar, taı úkimetiniń basshysy saýda-ekonomıkalyq jáne ınvestıtsııalyq yntymaqtastyqty damytý qajettigi týraly aıtty. Keıingi birneshe jylda ózara taýar aınalymy dáıekti túrde ósip, odan ári yntymaqtastyq áleýetin saqtap keledi. Logıstıkalyq qashyqtyqty eskere otyryp, Praıýt Chan-ocha taýarlardy jetkizýdiń balama joldaryn izdeý qajettiligine nazar aýdardy. Bul rette taı kompanııalarynyń Qazaqstanda bıznes jobalardy iske asyrýǵa múddeliligi atalyp ótti.
Buǵan qosa, taraptar jahandyq azyq-túlik qaýipsizdigi salasyndaǵy ósip kele jatqan problemaǵa ortaq alańdaýshylyq bildirdi. Osyǵan baılanysty Elshi Qazaqstannyń bıdaıdy iri óndirýshilerdiń biri retinde álemniń muqtaj elderine astyq ónimderin jetkizý áleýetine toqtaldy.
Sondaı-aq, taraptar týrızmdi ózara damytý máselesin talqylady. Qazaqstandyq dıplomat týrıster aǵymyn arttyratyn eki el arasyndaǵy turaqty reıster sanynyń artýy týraly habarlady.
Kezdesý qorytyndysy boıynsha taraptar yntymaqtastyqty barlyq deńgeıde jalǵastyrýǵa kelisti.
Aıta ketsek, 12-13 qazanda Qazaqstan elordasynda AÓSShK VI Sammıti ótip, onda 27 múshe eldiń memleket jáne úkimet basshylary Keńesti tolyqqandy halyqaralyq aımaqtyq uıymǵa aınaldyrý qadamdaryn iske qosady.
Foto: QR Syrtqy ister mınıstrligi
