Tahtı kýbogy-2018: Tórt balýanymyz fınalda
ASTANA. QazAqparat - Iranda grek-rım kúresinen ótip jatqan halyqaralyq Tahtı-2018 kýbogynda tórt balýanymyz fınalǵa shyqty, dep habarlaıdy Qazaqparat.
Atalǵan týrnırge álemniń 13 elinen jınalǵan eń myqty balýandar synǵa túsýde. Olardyń qatarynda grek-rım kúresinen Qazaqstan quramasy da bar.
Jarystyń alǵashqy kúni otandastarymyz sátti óner kórsetip, tórt balýanymyz fınalǵa shyqty.
Birinshi bolyp, 63 kelide el namysyn qorǵaǵan Qudaıbergen Tursynov fınalǵa ótti. Ol fınalǵa deıin qyrǵyzstandyq jáne Grýzııalyq balýandaryn utty. 67 keli salmaqta Almat Kebispaev alǵashqy beldesýinde túrkııalyq balýandy jarys jolynan taıdyrsa, ekinshi beldesýinde óz otandasy Danııar Qalenovtan basym tústi. Jartylaı fınalda taǵy bir túrkııalyq balýan Murat Fıratty qapy qaldyryp, fınalǵa shyqty.
Sonymen qatar 72 keli salmaqtaǵy el namysyn qorǵaǵan Demeý Jadyraev alǵashqy beldesýinde ázerbaıjandyq Sanan Súleımanovty, ekinshi beldesýinde ırandyq Farshad Fakehty utyp fınalǵda beldesýge múmkindik alsa, 87 keli salmaqta Hýseın Mýtsolgov birinshi beldesýinde bolgar, ekinshi aınalymda túrik, úshinshi beldesýinde qyrǵyz balýandarynyń jaýyrynyn jer ısketip, fınalǵa shyqty.
Al jartylaı fınalda qarsylastaryna ese jibergen Meırambek Aınaǵulov, Ibragım Magomadov jáne Dastan Zarlyhanovtar búgin qola medal úshin synǵa túsetin bolady.
