«Tahograf» - qaýipsizdik qyzmetinde» aktsııasy ótedi
ASTANA. Qazannyń 4-i. QazAqparat. Qazannyń 4 men 31-i aralyǵynda a QR Kólik jáne kommýnıkatsııa mınıstrligi Kóliktik baqylaý komıteti «Tahograf» jyl saıynǵy aktsııasyn uıymdastyrady,
dep habarlaıdy KKM baspasóz qyzmeti.
Osy aktsııa avtojoldardaǵy jol-kólik oqıǵalary sanyn tómendetýge, avtomobıl kóligimen jolaýshylardy, bagajdy jáne júkterdi qaýipsiz tasymaldaýdy qamtamasyz etýge, sonymen birge avtokólik quraldary júrgizýshileriniń eńbek jáne demalys rejımi boıynsha buzýshylyqtardy anyqtaý jáne aldyn alýǵa baǵyttalǵan.
Respýblıkaishilik tasymaldarda tahograftyń qoldanylýy mindetti bolyp tabylatyn qatynastardyń túrleri kóbeıdi. Munda qazirgi qoldanystaǵy, sondaı-aq sandyq tahograftardy paıdalanýǵa jol beriledi.
Aktsııa barysynda «Avtomobıl kóligi týraly» QR zańynyń 9-babyna sáıkes qaýipti júkterdi tasymaldaıtyn, halyqaralyq, qalaaralyq jáne oblysaralyq jolaýshylar, bagaj jáne júk tasymalyn iske asyratyn avtokólik quraldary tekseriledi. Tasymaldaýshylarǵa jáne avtokólik quraldaryna júrgizýshilerdiń eńbek jáne demalys rejımin tirkeıtin baqylaý qurylǵylarymen (tahograftarmen) jabdyqtaý, sonymen birge dıagrammalyq dıskilerdi júrgizý bóliginde qoıylatyn talaptardyń saqtalýy baqylanatyn bolady.
Ótken jyly osyndaı aktsııa barysynda kóliktik baqylaý organdary 28 myń birlik avtokólik quraldaryn tekserdi. 6 mln. 642 myń teńge kóleminde aıyppul óndirildi.
Búgingi kúni QR Kólik jáne kommýnıkatsııa mınıstrligi Kóliktik baqylaý komıteti qyzmetiniń negizgi baǵyttarynyń biri avtomobıl kóligimen jolaýshylardy, bagajdy jáne júkterdi qaýipsiz tasymaldaýdy, avtojoldardaǵy jol-kólik oqıǵalarynyń azaıýyn qamtamasyz etý maqsatynda osyndaı saqtandyrý sharalaryn ótkizý bolyp tabylady.
Anyqtama. Qazirgi qoldanystaǵy jáne sandyq tahograf - jyldamdyq qozǵalysyn, júrgen joldy, júrgizýshilerdiń eńbek jáne demalys rejımin úzdiksiz tirkeıtin qurylǵy.
Bul qurylǵy jol qozǵalysy qaýipsizdigin qamtamasyz etedi, óıtkeni qalaaralyq jáne halyqaralyq tasymalda bolatyn apattardyń negizgi sebepteriniń biri júrgizýshilerdiń sharshaýy nemese osy kólik quraly úshin ruqsat etilgen jyldamdyq qozǵalysyn joǵarylatý bolyp tabylady.
