Tahaýı Ahtanovpen birge oqyǵan aqtóbelik qarııa apatty úıde turyp jatyr

Aqtóbe qalasynyń Áıteke bı aýdanynda turyp, bala kezde qalaǵa kóship kelgen Jumajan Shaýlenova bastaýysh synyp muǵalimi bolǵan. Ol 30-jyldary Qýandyq Shańǵytbaev, Tahaýı Ahtanovpen bir mektepte bilim aldy. Al ákesi Sultan Shaýlenov arab, latyn tilin meńgergen, mektepte ustaz boldy. Qazaqtyń birtýar azamattaryna dáris oqyǵan ustazdyń qyzy qazirgi ýaqytta apatty úıde turyp jatyr. Qolynda qujaty bar. Aǵashtan jasalǵan tireýdiń ústinde ómir súrip jatqan qarııa kezeginiń qashan keletinin bilmeıdi.

 

«Kúıeýim Malkajdan Makıbaev Uly Otan soǵysynyń ardageri, múgedek boldy. Jas kezimizde baspana týraly oılamadyq, eshkimnen kómek suramadym. Keıin bizge jataqhanadan bir bólme berdi. Men sol páterdi satyp, úı aldym. Biraq úıim apatty. Birtutas úıdiń eki ıesi bar. Biz tek eki bólmede turamyz. Jertólemiz buryn turǵyn úı retinde paıdalanylǵan. Terezesi, esigi bar. Pesh te jertólede jaǵylady. Bul jerdiń qabyrǵasy sógilgen, joǵary qabat tek aǵash tireýlermen aman tur. Bir kúni úıdiń edeni ortasyna túsip, mert bolamyz dep qorqamyn. Balalarym zeınetker, kishkentaı ulym ınsýlt alyp, jumysqa jaramsyz boldy. Al kelinim kezekshilikpen jumys isteıdi», - dedi qarııa Jumajan Shaýlenova.

Qujattary túgel, úıdiń tehnıkalyq pasporty bar. QR «Turǵyn úı qatynastary týraly» Zańyna tolyqtyrýlar men ózgertýler engizilgen kezde Jumajan Shaýlenova avarııalyq jaǵdaıda turǵan úıler tiziminde №24 bolyp tirkeldi. Al jasyna qaraı zeınetke shyqqandar tizimi boıynsha №641, Uly Otan soǵysy múgedekteri men qatysýshylaryna teńestirilgen adamdar tiziminde 626 boldy. Úsheýiniń eń tıimdisi apatty dep tanylǵan úılerdiń ıelerine beriletin páter degen tujyrymmen sol sanatty tańdady. Biraq bul kezek te jyljymaı tur. Aqtóbe qalalyq turǵyn úı qoryn esepke alý sektory eshkimge basymdyq bere almaıtynyn, ár adam tek kezegimen baspanaly bolatynyn jetkizdi.

«Úı ishi qulap, tek aǵashtardyń kúshimen tur. Aǵash tireýler bir kúni shirip, biz ortasynda qalýymyz múmkin. 2010 jyly arnaıy komıssııa tekserip, úı apatty degen qorytyndy shyǵardy. Sodan beri janymyzdy shúberekke túıip otyrmyz. Maǵan bul úıde jaǵdaı jasalmaǵan. Dárethana dalada. Qysta syrtqa shyǵa almaımyn. Pesh jertólede janyp tur. Gazdan aqaý ketse, biz bir sátti kúlge aınalamyz»,- dedi Jumajan Shaýlenova.

Qarııa ákesi Sultan Shaýlenovtiń estelik sýretin murajaıǵa bergen. Pedagog Lenın ordenimen marapattalǵan, qazaqtyń birtýar azamattaryna sabaq berdi.

«Ákem muǵalim boldy, ózim Qýandyq Shańǵytbaev, Tahaýı Ahtanovpen bir mektepte bilim aldym. Bul Aqtóbe oblysy, Áıteke bı aýdany, Araltoǵaı aýyly bolatyn. Olar soǵysqa attandy, biz tylda eńbek ettik. 1948 jyly Aqtóbege kelip, kezdestim. Ol kezde Tahaýı jazýshy, al Qýandyq basylymda eńbek etti»,- dedi qarııa ótkendi eske alyp.

Aqtóbe qalalyq tótenshe jaǵdaılar bóliminiń basshysy Bekbolat Nurashev aıtýynsha, qazir oblys ortalyǵynda 25 úı apatty dep tanylǵan. Onyń 11-i jeke úıler, ózgesi 1-2 qabatty kóppáterli úı. Apatty úıler qalanyń Týrgenev, Eset batyr, Qarasaı batyr, Gagarın kóshelerinde bar.