Taǵy da jol apaty...
ASTANA. 19 qazan. QazAqparat - Elordadaǵy Almaty aýdanyna qarasty B. Momyshuly jáne M. Jumabaev kósheleriniń qıylysynda 2013 jylǵy 18 qazanda saǵat 20:19-da «MAN» jolaýshylar avtobýsy (1987 jyly týǵan M. esimdi azamat, № 44 baǵdar) jáne «Mersedes» avtokóligi (1985 jyly týǵan T. esimdi azamat) qaqtyǵysyp, onyń saldarynan «Mersedes» avtokóligi órtke orandy.
Órt jalyny saǵat 20:49 shamasynda aýyzdyqtaldy. JKO saldarynan «Mersedes» avtokóliginiń júrgizýshisi jáne onyń jolaýshylary 1983 jyly týǵan Ch. esimdi azamat jáne 20-25 jas shamasyndaǵy qyz bala (aty-jóni anyqtalmaǵan) oqıǵa ornynda kóz jumdy. Qoǵamdyq kóliktiń 5 jolaýshysy medıtsınalyq kómek kórsetilgennen keıin jiberildi. Tótenshe oqıǵany joıýǵa QR TJM Astana qalasy bólimshesi jeke quramynyń qyzmetkerleri jumyldyryldy. Bul týraly QR TJM resmı saıty habarlaıdy.
