Taǵy bir balýan qyz álem chempıonatynyń qola júldegeri atandy
ASTANA. QazAqparat - Býharest qalasynda kúres túrlerinen 23 jasqa deıingiler arasynda ótip jatqan álem chempıonatynda Jámıla Baqbergenova qola júldeger atandy, dep habarlaıdy QazAqparat tilshisi.
QR grek-rım, erkin jáne áıelder kúresi federatsııasy málim etkenindeı, Jámıla 72 kg salmaqta úzdik úshtikke ilikti.
Jámıla Baqbergenova jarys barysynda Japonııa jáne AQSh balýandaryn tize búktirgenimen, jartylaı fınalda túrik sportshysyna jol berdi. Degenmen qola júlde úshin básekede úndistandyq qarsylasyn 11:0 esebimen oısyrata utty.
Bul - Qazaqstan quramasy qorjynyndaǵy besinshi qola medal. Onyń ekeýin grek-rım kúresi sheberleri jeńip alsa, úsheýi balýan qyzdarymyzdyń úlesinde.
Eske sala keteıik, budan buryn qos qazaqstandyq balýan qyzdyń álem chempıonatynyń qola júldegeri atanǵanyn jazǵan bolatynbyz.
Jeksenbi kúni márege jetetin álem chempıonatynyń sońǵy medaldaryn erkin kúres sheberleri sarapqa salady.
