Taǵy 6 ýnıversıtetti jabý máselesi sotta qaralyp jatyr

NUR-SULTAN. QazAqparat – Elimizdiń 6 joǵary oqý ornyn jabý máselesi sotta qaralyp jatyr. Bul jaıynda Bilim jáne ǵylym mınıstri kezindegi qyzmeti týraly esep bergen Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Akademııalyq derbestikti keńeıtýmen qatar, jaýapkershiligi tómen ýnıversıtetterdi jaýyp, sapany qamtamasyz ete almaıtyn JOO-lardy qaıta beıindeý boıynsha kúrdeli jumystar júrgizdik. Nátıjesinde 15 JOO jabyldy. Budan bólek, qosymsha 6 oqý ornyn jabýǵa qatysty sheshimimizge shaǵym berilip, ol sotta qaralyp jatyr. Onyń jalpy sany 21-ge jetip otyr. Jabylǵan ýnıversıtetterdiń 100 myńnan astam stýdentin oqýyn jalǵastyrý úshin basqa JOO-larǵa aýystyrdyq. 66 ýnıversıtettiń álsiz bilim berý baǵdarlamalary boıynsha 505 lıtsenzııany keri qaıtaryp aldyq», - dep jazdy mınıstr Facebook paraqshasynda.

Sonymen qatar ol oqytýdyń álsiz baǵyttary boıynsha lıtsenzııany qaıtaryp alý úshin taǵy 4 JOO-men sot protsesi júrip jatqanyn atap ótedi.

«Pedagogıkalyq baǵyttar boıynsha joǵary oqý oryndarynyń sany (85-ten 50-ge deıin) qysqardy. Endi oqytýdyń tıisti sapasyn qamtamasyz etetinder ǵana bolashaq muǵalimderdi daıyndaı alady. Zańgerlerdi daıarlaıtyn ýnıversıtetterdiń sany 72-den 61-ge deıin qysqardy», - dedi Ashat Aımaǵambetov.