Taǵy 500-deı astanalyq memlekettik turǵyn úı baǵdarlamasy boıynsha baspanaly bolady
ASTANA. Qazannyń 15-i. QazAqparat /Gúlnár Jandaǵulova/ - Taǵy da bes júzden astam astanalyq memlekettik baǵdarlama boıynsha páterlerge ıe bolady.
«Qazaqstan Respýblıkasyndaǵy 2008-2010 jyldarǵa arnalǵan Turǵyn úı qurylysynyń memlekettik baǵdarlamasyn júzege asyrý sheńberinde aǵymdaǵy jyly qazannyń 11-inde Turǵyn úı komıssııasynyń otyrysy boldy. Onda «balalary bar jas otbasylar», «memlekettik qyzmetshiler», «memlekettik kásiporyn qyzmetkerleri», «memlekettik qyzmetshi bolyp tabylmaıtyn, memlekettik mekeme qyzmetkeri» sanattary boıynsha 554 ótinish bildirýshi páter ıelenýge úmitker retinde bekitildi», delingen ákimdiktiń baspasóz qyzmeti taratqan aqparatta.
Atalǵan sanattar boıynsha bekitilgen ótinish bildirýshilerdiń tizimi elorda ákimdiginiń resmı saıtynda jarııalanyp otyr.
