Taǵy 20 eldiń azamattaryna Ázerbaıjanǵa ushyp kelýge ruqsat berildi

BAKÝ. QazAqparat – 5 tamyzdan bastap 20 eldiń azamattaryna, sondaı-aq osy elderde turaqty turatyn basqa memleketterdiń azamattaryna jáne azamattyǵy joq adamdarǵa Ázerbaıjanǵa áýe kóligimen saparlaýǵa (jáne shyǵýǵa) ruqsat etiledi, dep habarlaıdy QazAqparat menshikti tilshisi.

Habarlanǵandaı, bul ózgerister Mınıstrler kabınetiniń 2021 jylǵy 26 mamyrdaǵy № 151 «erekshe karantındik rejımdi uzartý jáne keıbir shekteýlerdi alyp tastaý jónindegi sharalar týraly» qaýlysyna engizilgen túzetýde kózdelgen.

Ózgeristerge sáıkes, 5 tamyzdan bastap Ázerbaıjanǵa Germanııa, Avstrııa, Belgııa, Chehııa, Danııa, Irlandııa, Ispanııa, Shvetsııa, Shveıtsarııa, Kanada, Lıýksembýrg, Malta, Nıderlandy, Polsha, Portýgalııa, Serbııa, Sıngapýr, Slovenııa, Slovakııa jáne Grekııadan ushyp kelýge ruqsat etiledi.

Eske sala keteıik, buǵan deıin Ázerbaıjan úkimeti Reseı, Túrkııa, AQSh, Bahreın, Birikken Arab Ámirlikteri, Ulybrıtanııa, Izraıl, Vengrııa jáne Katarǵa qatysty osyndaı sheshim qabyldaǵan bolatyn.

Qazaqstanǵa qatysty aıtar bolsaq, týystaryna barýdy josparlap otyrǵan nemese Ázerbaıjanda turýǵa yqtııarhaty bar elimizdiń azamattaryna Ázerbaıjan Respýblıkasy Mınıstrler kabıneti janyndaǵy jedel shtabtyń arnaıy sheshimi boıynsha, jasalǵanyna 72 saǵattan aspaǵan PTR-testiniń teris nátıjesi jetkilikti.