Taǵy 12 eldiń azamattary Qazaqstanǵa vızasyz kire alatyn boldy

NUR-SULTAN. QazAqparat – Qazaqstanǵa vızasyz rejimde kire alatyn memleketterdiń tizimi 12 elmen tolyqty. Bul týraly «Kazakh Tourism» ulttyq kompanııasynyń marketıng jáne kommýnıkatsııalar departameniniń aǵa menedjeri Baqyt Toptaeva málim etti, dep habarlaıdy QazAqparat tilshisi.

«Ońtústik-Shyǵys Azııa, atap aıtqanda Vetnam, Indonezııa, Fılıppın, Taıland, sonymen qatar Bahreın, Oman, Kýveıt, Saýd Arabııasy jáne Katar sııaqty birneshe arab elderiniń azamattary budan bylaı Qazaqstanda 30 kúnge deıin vızasyz tura alady. 12 eldiń tizimine sonymen birge Vatıkan, Lıhtenshteın jáne Kolýmbııa da kirdi. Atalǵan elderge vızasyz rejim 30 qyrkúıekten bastap kúshine enedi. Al jalpy 76 eldiń azamattary Qazaqstanǵa vızasyz rejımde kelýge quqyly», - dep habarlaıdy Baqyt Toptaeva.

Ulttyq kompanııa ókiliniń aıtýynsha, 18-20 qyrkúıek aralyǵynda Qazaqstan astanasynda Halyqaralyq RATA Travel Mart týrıstik kórmesi ótken. Azııa jáne Tynyq muhıty aımaǵyndaǵy týrızm ındýstrııasynyń negizgi oıynshylary, sonymen qatar Eýropa, Afrıka jáne Amerıkadaǵy týroperatorlar Qazaqstannyń áleýetine oń baǵa berip ketken.

Týrıstik qaýymdastyqtyń jergilikti ókilderimen ótkizilgen B2B kezdesýleriniń nátıjesinde jańa týrıstik ónimderdi nasıhattaý boıynsha yntymaqtastyq týraly aldyn ala kelisimder jasaldy. Shara qatysýshylary Qazaqstanda vızasyz rejımniń keńeıýi týraly bul jańalyqty qýana qabyldaǵan.