«Taǵy tórt jyl kútýge shamam jete me, bilmeımin»: Kırıll Gerasımenko Parıj Olımpıadasyn qorytyndylady

ASTANA. KAZINFORM — Ústel tennısinen Qazaqstan komandasynyń múshesi Kırıll Gerasımenko Parıj Olımpıadasyndaǵy jarys jolyn aıaqtady.

Ol týrnırdiń 1/8 aınalymyna deıin jetip, egıpettik Omar Assardan utyldy. Oıyn sońynda suhbat bergen sportshy óziniń búgingi kezdesýin qorytyndylap, aldaǵy Olımpıada oıyndaryna qatysty josparyn aıtty, dep jazdy Olympic.kz.

«Oıyndy jaqsy bastap, 2:0 esebimen alǵa shyqtym. Al ári qaraıǵy jeńiliske qarsylastyń taktıkalyq josparyn ózgertkenin ańǵarmaǵanymyz sebep sııaqty. Úshinshi jáne tórtinshi settegi esep aıyrmasy tym qysqa boldy. Árbir partııanyń sońy birdeı boldy desem, artyq emes. Men óte belsendi oınadym. Dop óte bıik ushty, ústeldiń shetine túsip jatty. Mundaıdy múlde kútpep edim. Sondaı-aq, jankúıerlerdiń shýylyna azdap erip ketkendeımin. Biz tynyshtyqta oınap úırengenbiz, biraq men tájirıbeli sportshy bolǵandyqtan, bul aıtarlyqtaı kedergi demeımin. Oıyn sońyna qaraı sheberlik jetpeı qaldy. Bir jaǵynan, osynyń aldyndaǵy aýyr matchtan keıin de qalypqa kelip úlgermedik. Bizde massajshylardyń bolǵany qandaı jaqsy. Mundaı oıyndardan soń uıqyǵa ketý qıyn. Osy turǵyda bizge bar jaǵdaı jasalǵan. Endi ári qaraı jumys isteý úshin meniń motıvatsııam men nıetim jetedi dep úmittenemin. Osy kúızelisti jeńý kerek. Meniń jarysqa qatysyp júrgenime 15 jyl boldy,otbasymdy múlde sırek kóremin. Qandaı da bir merekelerdi birge atap ótpeımin. Sondyqtan, aldaǵy Olımpıadaǵa daıyndalyp, taǵy tórt jyl kútýge shamam jete me, bilmeımin. Oılanamyz. Qarsylasyma keler bolsam, men onymen jıi kezdestim. Birde ol, birde men jeńip júrdik. Afrıkanyń chempıony, jaqsy oıynshy. Bul Olımpıadany osy jerden aıaqtadym. Jankúıer bolǵan barshańyzǵa raqmet. Ári qaraı oınamaıtynym ókinishti», - dedi Gerasımenko.