Taǵy tórt qazaqstandyq kásiporyn BAÁ ımporttaýshylary tizimine kirdi
ASTANA. KAZINFORM – QR Aýyl sharýashylyǵy mınıstrligi Veterınarııalyq baqylaý jáne qadaǵalaý komıteti sheteldik naryqtarda básekege qabiletti qazaqstandyq ónimdi ilgeriletý, sonyń ishinde mal ónimderin BAÁ-ge eksporttaýǵa quqyly otandyq kásiporyndar tizbesin keńeıtý boıynsha jumystardy jalǵastyryp jatqanyn málimdedi.
Mınıstrlik málimetinshe, júıeli sharalardyń nátıjesinde bıyl taǵy 4 kásiporyn resmı túrde BAÁ ımporttaýshylarynyń Reestrine engizildi.
Bul – ulttyq ónim eksportynyń aýqymyn keńeıtýdegi asa mańyzdy qadam. Atalǵan sheshim otandyq óndirýshilerdiń halyqaralyq qaýipsizdik pen sapa standarttarynyń joǵary talaptaryna tolyq sáıkes keletinin rastaıdy.
Osy rette Qorshaǵan orta jáne klımat ózgerisi mınıstrligi janyndaǵy BAÁ Taǵam qaýipsizdigi agenttiginiń basshysy Abdýlla Djanaannyń resmı sapary aıasynda komıtet ókilderimen jumys kezdesýi ótti. Taraptar ózara yntymaqtastyqtyń ózekti máselelerin, eksporttyq jetkizilimderdi arttyrý múmkindikterin jáne azyq-túlik qaýipsizdigin baqylaý salasyndaǵy ózara is-qımyldy tereńdetý bolashaǵyn talqylady.
Sapar barysynda MOSSAE delegatsııasy 2020 jyldan beri tizilimde bar jáne BAÁ-ge sıyr eti ónimderiniń negizgi jetkizýshileriniń biri sanalatyn KAZBEEF kásipornyna da bardy. Delegatsııa kásiporynda engizilgen qaýipsizdik, sapa jáne ónimniń qadaǵalanýy standarttaryna joǵary baǵa berip, yntymaqtastyqty keńeıtýdiń áleýeti zor ekenin atap ótti.
Jalpy, búgingi tańda mal ónimderin óndirý jáne eksporttaýmen aınalysatyn 14 qazaqstandyq kompanııa BAÁ ımporttaýshylarynyń Reestrine engizilgen.
Bul tizimniń keńeıýi Qazaqstannyń Taıaý Shyǵys naryǵyndaǵy pozıtsııalaryn kúsheıtip, ulttyq agrarlyq eksportty ósirýge qosymsha múmkindik deýge bolady.
Buǵan deıin mınıstr sıyr etine kórshi elderden suranys joǵary ekenin aıtqan edi.