Taǵy eki sheteldik azamat Neo Nomad vızasyn ıelendi

ASTANA. KAZINFORM — Taǵy eki sheteldik azamatqa zamanaýı kóshpendilerge arnalǵan Neo Nomad Visa berildi, dep habarlaıdy Kazakh Tourism.

Olardyń biri — Ońtústik Koreıa azamaty, ekinshisi — Sıngapýr turǵyny.

Sonymen qatar AQSh azamaty da atalǵan vızany alýǵa nıet bildirgen. Búginde onyń ótinishi qarastyrylý ústinde.

Neo Nomad Visa álemniń ártúrli elderinen kelgen saıahatshylar úshin jańa múmkindikter ashady. Bul vıza sheteldik týrısterge mobıldilikti saqtap, óziniń sheteldik kompanııasynda qashyqtan jumys isteýge jáne Qazaqstanda bir jylǵa deıin turýǵa jol ashady.

— Jańa V12-1 vızasyn alý úshin Qazaqstan Respýblıkasynyń sheteldegi elshiligine nemese konsýldyq mekemelerine júginý qajet. Atap ótken jón, ótken jyly birinshi Neo Nomad vızany energetıka salasynda eńbek etetin Ulybrıtanııa azamaty aldy. Ony rásimdeý úshin sheteldikter Qazaqstannyń sheteldegi elshiligine nemese konsýldyq mekemelerine júginý qajet, — dep atap ótti Kazakh Tourism kompanııasy.

Buǵan deıin habarlanǵandaı, Qazaqstanda zamanaýı kóshpendilerge arnalǵan jańa Neo Nomad vızasy engizildi.