Taǵy eki kolledj jańa oqý jylynan bastap sý salasyna mamandar daıarlaıdy
ASTANA.KAZINFORM - 2026-2027 oqý jylynan bastap sý sharýashylyǵy salasy úshin mamandar daıarlaıtyn kolledjderdiń tizimi taǵy eki oqý ornymen tolyǵady. Bul týraly Sý resýrstary jáne ırrıgatsııa mınıstrligi habarlady.
O.Turmaǵanbetuly atyndaǵy Mańǵystaý ındýstrııalyq-tehnıkalyq kolledji «Tehnık-gıdrolog» jáne «Gıdrogeologııa jáne ınjenerlik geologııa» mamandyqtary boıynsha kadr daıarlaýdy bastaıdy. Al Qaraǵandy oblysyndaǵy Temirtaý joǵary polıtehnıkalyq kolledjinde «Gıdrotehnıkalyq qurylys» mamandyǵy boıynsha mamandar daıarlanady.
Qazir sý sharýashylyǵy salasy úshin kadrlar daıarlaýdy 757 stýdent oqıtyn 8 arnaýly orta oqý orny júzege asyrady. 2025-2026 oqý jylynyń qorytyndysy boıynsha atalǵan kolledjderdi 208 túlek támamdady.
– Osy kolledjderde bilim alyp jatqan bolashaq sý mamandary óndiristik tájirıbeden «Qazsýshar» RMK fılıaldarynda ótedi. Sý resýrstary jáne ırrıgatsııa mınıstrligi sý sharýashylyǵy salasyna mamandar daıarlaıtyn barlyq oqý ornymen tıisti memorandýmdarǵa qol qoıǵan. Bıyl sý salasynda óndiristik tájirıbeden ótetin stýdentter sany byltyrmen salystyrǵanda eki esege jýyq artty. Kolledjderde stýdentter «Gıdrotehnıkalyq qurylys», «Gıdrotehnıkalyq melıoratsııa», «Sýmen jabdyqtaý jáne sý burý júıeleriniń tazartý qurylystaryn paıdalaný» jáne «Gıdrogeologııa» mamandyqtary boıynsha bilim alyp jatyr, – dedi QR Sý resýrstary jáne ırrıgatsııa mınıstrliginiń Ǵylym jáne ınnovatsııalar departamentiniń dırektory Marat Imanalıev.
Aıta keteıik, Ortalyq Azııadaǵy sý resýrsy men energetıka máseleleri boıynsha mańyzdy kelisim jasaldy.
