Taǵy bir halyqaralyq forým ótkizilmeıtin boldy

ASTANA. KAZINFORM – QR Tsıfrlyq damý, ınnovatsııalar jáne aeroǵarysh ónerkásibi mınıstrligi sý tasqynyna baılanysty iri is-sharalardan bas tartý týraly Prezıdent tapsyrmasyna sáıkes, Digital Bridge 2024 halyqaralyq ІT-forýmyn ótkizýden bas tartty. Forým Astanada osy jyldyń 5-7 qyrkúıegine josparlanǵan bolatyn.

Digital Bridge 2018 jyldan beri IT-ındýstrııanyń sońǵy tendentsııalary men damý perspektıvalaryn talqylaýǵa arnalǵan Ortalyq Azııadaǵy eń iri alań bolyp keldi. Bul forým tek 2020 jyly tótenshe jaǵdaıda – jahandyq COVID-19 pandemııasynda ótkizilgen joq.

«Bıyl kóktemdegi sý tasqyny Qazaqstandaǵy sońǵy 80 jyldaǵy eń iri tabıǵı apat boldy. Osyǵan baılanysty, aýqymdy qıratý saldaryn joıý jáne el azamattaryna kómek kórsetý úshin qarajatty únemdeý maqsatynda Memleket basshysy Úkimetke josparlanǵan ımıdjdik jáne basqa da iri is-sharalardy ótkizýden bas tartýdy tapsyrdy. Digital Bridge uıymdastyrýshylary forýmǵa qatysýǵa múddeli barlyq adamdarǵa alǵys bildiredi. Qolaıly jaǵdaılarda Digital Bridge halyqaralyq IT-forýmy óz jumysyn 2025 jyly qaıta bastaıdy», - dep habarlady mınıstrlik.

Buǵan deıin Memleket basshysy 13-14 maýsymǵa josparlanǵan Astana halyqaralyq forýmyn ótkizbeý týraly sheshim qabyldaǵan edi.

Sondaı-aq, Ónerkásip jáne qurylys mınıstrligi 25-26 sáýirge josparlanǵan Qazaqstan mashına jasaýshylarynyń HІІ forýmyn ýaqytsha toqtatty.