Taǵy bes jol ýchaskesinde ortasha jyldamdyqty baqylaý iske qosylady
ASTANA. KAZINFORM — 10 shildeden bastap avtojoldardyń taǵy bes ýchaskesinde ortasha jyldamdyqty baqylaý júıesi jumysyn bastaıdy, dep habarlaıdy QR ІІM baspasóz qyzmeti.
ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranovanyń sózinshe, Іshki ister mınıstrligi jol júrisi qaýipsizdigin arttyrý baǵytyndaǵy jumysty jalǵastyryp jatyr. Jol-kólik oqıǵalarynyń aldyn alýdyń tıimdi sharalarynyń biri — avtokólik joldarynda kólik quraldarynyń ortasha jyldamdyǵyn baqylaý. Bul tásil qaýipti manevrlerdiń, jyldamdyqty kúrt arttyrýdyń aldyn alyp, júrgizýshilerdiń búkil jol boıynda belgilengen jyldamdyq rejımin saqtaýyna yqpal etedi.
— 2025 jylǵy 17 naýryzdan bastap ortasha jyldamdyqty baqylaý respýblıkalyq mańyzy bar aqyly avtojoldardyń jalpy uzyndyǵy shamamen eki myń shaqyrymdy quraıtyn segiz ýchaskesinde júzege asyrylýda. 2026 jylǵy 10 shildeden bastap bul júıe jalpy uzyndyǵy 525 shaqyrym bolatyn taǵy bes ýchaskede iske qosylady: Aqtóbe — Qandyaǵash, Almaty — Qorǵas, Kókshetaý — Petropavl, Astana — Temirtaý jáne Astana — Şýchınsk avtojoldarynyń qosymsha ýchaskeleri, — dedi ol.
Sonymen qatar, qazir jalpy uzyndyǵy shamamen 2,5 myń shaqyrym bolatyn taǵy 14 aqyly jol ýchaskesin kezeń-kezeńimen osy júıege qosý máselesi qarastyrylyp jatyr.
Aqtoty Boranova atap ótkendeı, ortasha jyldamdyqty baqylaý júıesin engizýdegi basty maqsat — júrgizýshilerdi jazalaý emes, adam ómirin saqtaý. Statıstıkaǵa sáıkes, jyldamdyqty shamadan tys arttyrý aýyr zardaptarǵa ákeletin jol-kólik oqıǵalarynyń negizgi sebepteriniń biri bolyp qala beredi.
— Barlyq jol júrisine qatysýshylardy belgilengen jyldamdyq rejımin saqtaýǵa, jolda muqııat ári jaýapty bolýǵa shaqyramyz. Jolda únemdelgen birneshe mınýt adam ómirinen qymbat emes. Jol qaýipsizdigi árqaısymyzǵa baılanysty. Ózderińizdi jáne jaqyndaryńyzdy saqtańyzdar! — dep eskertti ІІM ákimshilik polıtsııa komıtetiniń erekshe tapsyrmalar jónindegi aǵa ınspektory.
Buǵan deıin elimizde 10 shildeden bastap birqatar avtojol aqyly bolatynyn jazǵan edik.
