«Taǵdyrlardy biriktirgen Qazaqstan» atty kitap saıası qýǵyn‑súrgin qurbandarynyń azaly beınesine arnalady - E. Toǵjan
ASTANA. Mamyrdyń 31-i. QazAqparat /Qanat Mámetqazyuly/ ‑ «Elimizdegi sútteı uıyǵan barlyq ult pen ulys ókilderine, ásirese, jas urpaqqa arnalǵan «Taǵdyrlardy biriktirgen Qazaqstan» atty kitap jaryq kórdi.
Qazaqstan halqy Assambleıasynyń, Saıası qýǵyn‑súrgin jáne totalıtarızm qurbandarynyń «ALJIR» memorıaldy kesheniniń bastamasymen, sondaı‑aq TMD Memleketaralyq gýmanıtarlyq yntymaqtastyq qorynyń qoldaýymen jaryq osy eńbek árbirimizdiń júregimizdi jaralap kelgen saıası qýǵyn‑súrgin qurbandarynyń azaly beınesine arnalady». «Tarıhtan taǵylym‑ótkenge taǵzym» atty halyqaralyq forýmdaǵy týyndy tanystyrylymy barysynda Qazaqstan halqy Assambleıasy tóraǵasynyń orynbasary Eraly Toǵjan osylaı dedi.
«Sol jyldary stalındik qandy terrordyń qaraly jalyny sharpymaǵan eshkim qalmaǵan edi. Zulmat qasireti Keńes Odaǵynyń quramyndaǵy barlyq elderdi, barsha ult pen ulysty, ártúrli jastaǵy azamattardyń bárin de qamtyǵan bolatyn. Qyzyl ımperııanyń qany tamǵan zamanda elimizde 20-dan astam lager jumys istep, olarda 800 myńnan astam asyl azamattar azap shekti. Al Assambleıanyń qoldaýymen jaryq kórgen bul kitap árbirimizdiń júregimizdi jaralap kelgen saıası qýǵyn‑súrgin qurbandarynyń azaly beınesine arnalady. Bul kitap - Otanym dep, arysym dep, namysym dep oshaq otyn sóndirmeı qalǵan analarǵa qoıylǵan eskertkish. Bul ‑ keıingi urpaqqa sabaq úshin, bolashaqqa baǵdar úshin qoıylǵan tańǵy shyqtaı taza, tamshy sýdaı móldir belgi», dedi E. Toǵjan.
