Taǵdyr tálkegine ushyraǵan jetim qyzdyń ómiri ózgerdi - Almaty oblysy
TALDYQORǴAN. QazAqparat - Almaty oblysynyń ákimi Amandyq Batalov balalar úıiniń tárbıelenýshisine páter syılady. Bul jóninde oblys basshysynyń orynbasary Jaqsylyq Omar Feısbýktegi óz paraqshasynda jazdy, dep habarlaıdy QazAqparat tilshisi.
«Ótkende «Jetisý» telearnasynyń «Bolmys» baǵdarlamasynda Gúlim Núrkebaevanyń taǵdyryn estigen el egildi. Sodan keıin arnaıy Analar úıine baryp, tanystym. Bar jaǵdaıdan habardar bolǵan oblys ákimi Amandyq Ǵabbasuly Gúlimmen kezdesip, Taldyqorǵannan páter berdi. Sábıimen 6 aılyq reabılıtatsııadan ótkennen keıin óz úıine ıe bolady», - dep jazǵan J.Omar.
Gúlim Núrkebaeva Kerbulaq aýdanynda dúnıege kelgen. Ol 12 jasynan bastap týǵan sińlisi ekeýi «Aınalaıyn» balalar úıinde tárbıelengen. Anasynan erte aıyrylǵan Gúlim ákesinen beıhabar. Sózinshe, ol eki jasta bolǵanda anasy ákesimen ajyrasyp ketken. Taǵdyr tálkegine ushyraǵan jáýdir kóz ár jerde jumys istep, nápaqasyn tapqan. Kolledjde bilim alyp, maman atanǵan.
24 jastaǵy Gúlim Núrkebaevanyń aıtýynsha, alty jyl kóńili jarasqan jigitiniń ata-anasy onyń jetimdigin betine basyp, úılenýlerine túbegeıli qarsylyq bildirgen.
«Meniń týystarym bar, myna jetim qyzdy kelinim dep elderge qalaı kórsetemin. Eger osy qyzǵa úılenetin bolsań, men anańmen ajyrasyp ketemin. Toıymyzǵa úsh kún qalǵanda ákesi osylaı qarsylyq bildirdi», - degen bolatyn «Bolmys» baǵdarlamasy barysynda Gúlim.
Onyń sózine qaraǵanda, keıin súıiktisiniń úıine aıaǵynyń aýyr ekenin aıtyp barǵan. Biraq jigittiń áke-sheshesi tún ortasynda úıden qýyp shyqqan. Barar jeri, basar taýy qalmaǵan ol qazir analar úıinde turyp jatyr. Ol óziniń turǵylyqty meken-jaıynyń durys bolmaýyna baılanysty dúnıege kelgen balasyna járdemaqy da ala almaǵan. Gúlimniń ózinen úlken eki apaıy bar.
«Biraq olardyń maǵan kómek kórsetetin shamasy joq», - deıdi ol.
Aıta keteıik, Almaty oblysynyń ákimdigi 2015 jyly Taldyqorǵanda 60 páterli kópqabatty úı salyp, ata-ana qamqorlyǵynsyz qalǵan balalarǵa bergen bolatyn.
